[Ka madan ban pynlong ia ka FETE, shnong Khimusniang ha Khliehlamcha, PHE]
Ka Dorbar Shnong Khimusniang ka pyntip paidbah sha baroh ki nongshong shnong bad sha ki paralok parajor ba ki dei ban bud ryntih ia ki kyndon bad ki jingpyniaid shnong khnang ba ka jingthmu jong ka jingpynlong ia ka Fete shnong ka ban sa long ha ka 19 bad 20 tarik mynta u bnai ha Khlieh Lamcha (PHE) kan long kaba jop.
La kyrpad ia ki nongshong shnong baroh ba kim dei ban pynieng kali harud surok main road ha ka 20/10/2023 naduh ki bynta jong ka Lad MeECL ter ter haduh ka jaka ba pynlong ia ka Fete shnong, khnang ban ailad shwa ia ki paralok parajor ba wan na jngai ban pynieng ia ki kali jong ki haba ki poi sha kane ka Fete. Kumta kito ki nongshong shnong kiba ju pynieng kali harud surok bah bad ki bym don jaka pynieng kali ki lah ban leit pynieng ne buh ia ki kali jong ki ha Indoor Sports Hall jong ka Shnong ha katei ka sngi.
La kyrpad ruh ia ki trai shnong ba kim dei ban wan rah da ki kali lajong haba ki wan sha kane ka Fete, khnang ban lait na ka jingkhapngiah bad ba kan pynsuk ia ki paralok kiba nabar shnong kiba wan na jngai.
La kyntu ruh iaki samla jong ka shnong (Khimusniang) ban long kiba kylluid mynsiem ban pdiang burom ia ki lok ki jor ha kitei ki sngi ba pynlong ia ka Fete, khnang ba ka Fete kan long kaba jop bad iong jingmyntoi kumba long ha kiwei pat ki snem ba la dep.
La kyrpad ia baroh ki long kmie long kpa, ki samla shynrang bad kynthei ki bym shym la shah bynshet kam (Appointment) ba kin sngewbha ba sngewtrai ia ka kam bad ki lah ban iarap kylluid mynsiem ha kano kano ka stall kaba duna ki nongtrei. Ha ka juh ka por ban wan mih shapoh Indoor Sports Hall na ka bynta ban iakhylliap ia ki tiket Lucky Draw.
Ha ka juh ka por ka Shnong ka ai khublei ia baroh ki nongshong shnong kiba la pynkhuid bad kit lut ia baroh ki tiar ki tar bad ki mar kiba buh harud surok bah, khnang ban pynkylluid ia ki lynti ki syngkieng na ka bynta ka jingdonkam jong ka shnong.
Na ka bynta ki nongwan sha ka Fete ka Dorbar Shnong Khimusniang ka pdiang sngewbha ia baroh kiba na jan bad na jngai, kiba kloi ban wan ai ka jingkyrshan ia ka shnong bad la kyrpad ba kin sngewbha ban bud ryntih ruh ia ka rukom pynieng kali, khnang ba kan ym don kano kano ka jingpynthud ha ka iaid ka ieng jong ki paidbah.
Kum ka jingpyntip ba ki jaka pynieng kali ki long kiba biang bad kiba kylluid, ha kaba ki nongwan sha ka Fete kim donkam ban khuslai ei ei ban poi sha ka madan ba pynlong ia ka Fete ha Khlieh Lamcha (PHE).
Khadduh eh ka Dorbar Shnong ka khot ia baroh ki khun jong ka shnong “Tylli deilang u toor chaphrang” bad kyrmen ba kane ka Fete kan long kaba iohnong bad jop na ka bynta ki jingdonkam jong ka shnong hi baroh kawei, pynkut ka kyrwoh.
