Ka jingpyntrei ia ka Iawmusiang Shopping Complex ka sah ha Umdum : JTTA

[KUMBA ONG KA KTIEN IADUR KI MASI IAP KI PHLANG KI KYNBAT: JTTA]

                Ka Jaintia Tribal Traders Association (JTTA) ha ka jingbuddien ka jong ka ia ka jingpyntrei ia ka Iawmusiang  Shopping Complex la bun bnai, ka Seng kala leit ban ia kynduh ia u Executive Engineer P.W.D Building ban wad jingmut na u, na kaei ka daw la sangeh ban pyntrei ia ka Iawmusiang Shopping Complex, na ka liang  jong u Engineer ula pynshai ba na ka liang jong ka Department ka la dep ban ai shithi sha u Contractor ba un sdang trei noh ia ka kam ba dang sah teng jong ka Iawmusiang, hynrei u khlem jubab ia ka shithi jong ki, bad u khlem sdang shuh ban trei ia ka kam. Te na ka liang jong ka Department da ka jingbym banse ka hap ban pynduh (cancel) noh ia ka jingtrei na u, te na ka liang jong ka Department ka dang process ban khot Tender noh ia ki kam ba dang sah ban pyntrei noh ia ka Iawmusiang.

                Hadien katto katne ka P.W.D Building kala khot Tender thymmai ia ki kam kiba dang sah, imat une u Contractor ula iohi ia kane, u la ai noh da ka Case pyrshah ia ka tnat (P.W.D) Building.

                Kumta ka Seng ka khlem lah ban shu sngap ne peitkai ia kane ka kam, ka kwah ban ioh jingshai da kaba kham bniah, ka la leit ban ia kynduh ia une u Contractor, ba na  kaei ka daw u la ai case ia ki tnat P.W.D (Building) haduh ba ka kam kala sahteng. Ka Seng kala pyni ha u ia ka shithi jubab jong ka Executive Engineer P.W.D Building. Naka liang jong u Contractor ula iathuh ia ka Seng baka Department  ka khlem lah ban siew ia ka pisa kaba dang sah ka jong u, kumno yn sdang ia kaba thymmai.

                Shuh shuh ka Seng, ka sngew dei ban pan noh da ka Right to Information (R.T.I) na ka Jaintia Hills Autonomous District Council kum ka trai jong kane ka Complex bad ruh na ka tnat P.W.D (Building) kum ka nong pyntrei ia kane ka project.

                Kumta ka Seng lyngba u President ma Iatha Najiar ka la pan noh da R.T.I na ka JHADC bad ruh na ka tnat PWD (Buildings).

                Hynrei halor ki jubab kiba ngi ioh lyngba jong ka R.T.I ka la pynlyngngoh ia ka Seng, kumno la khot tender thymmai ia ka jingtrei haba tang ka pisa na ka bynta ka 2^nd Installment ym pat don, kumno u MLA jong ka Jowai u ong ba lym da dei ba ai Case u Contractor, la ioh ban sdang ia ka jingpyntrei ia ka Iawmusiang Shopping Complex. Ka Seng ka pynpaw ba ka sngew ba kane ka kam ka sah mynta haka Umdum, kam poi shano shano ruh bad kumba ong ka ktien “Iadur ki Masi iap ki plang ki kynbat” pynkut ka Seng.