Ka Sorkar Jylla lyngba ka Directorate of Information & Public Relations (DIPR), mynta ka sngi ka 20 tarik Nailar 2024 ka la pynlong ha ka sien ba nyngkong eh ia ka jingiakynduh lang ki nongthoh khubor jong ka jylla halor ka phang ka jingbatai thymmai ia ka kam thoh khubor ha ka Digital.
Ha kane ka sngi la wan ban don ryngkat da u Myntri Rangbah ka sorkar jylla u Conrad K Sangma, ka myntri ka tnad Information & Public Relations ka Dr. Mazel Ampareen Lyngdoh ki ophisar ka tnad Information & Public Relations ha ryngkat ki Nongthoh khubor jong ka jylla.
Ha kane ka juh ka sngi la pynkup burom ia 8 ngut ki Nongthoh khubor ka jylla kiba la rangbah kiba la noh synniang ha ka kam thoh khubor da u Myntri Rangbah bad ka Dr. Ampareen Lyngdoh.
Ki nongthoh khubor ba la shah pynkup burom ki long u Sanat K. Chakraborty (Independent Journalist), u Bah Philip Marweiñ (Editor Youth Today), u Bah Monarch Shabong (Editor Rupang), u Sanjeev Bhattacharjee (Photographer), u Subroto Bhattacharjee (Bureau Chief, UNI), u Manas Choudhary (Editor barim ka The Shillong Times), ka Linda Chakchuak (Independent Journalist) bad u Bah Marcus M Thaiang ba dei u Editor KotKhubor Yutip bad Executive Editor Yutipnews Portal (website) na Ri Lum Jaiñtia.
Ha ba ai jingkren u myntri rangbah ka jylla u Conrad K Sangma, u la ong ba donkam ban leh shibun ban ithuh ia ki jingnoh synniang da ki nongthoh khubor bad bynrap, “Kane ka dei ka por ba ngi kum ka sorkar ngi la sngew donkam ban don ia ki prokram kiba kum kine ban ithuh bad ai khublei ia ka jingtrei shitom da ki nongthoh khubor, ka jing ïakynduh bad ïakren ïa ka lynti ban ïaid shakhmat ha ka jingmyntoi kaba kham heh jong ki nongthoh khubor ban pynthikna ba ka tnat kan roi da kaba bud ïa ki kyndon bad ruh ban pynbeit ïalade bad ki jingkylla ha ka juk teknoloji.
U Myntri Rangbah ka Jylla u la ong ba ka don ka jingdonkam man ka por ban pyniadei bad ka jingkylla ka teknoloji bad ka jingdonkam ban pynthymmai ia ki bynta bapher bapher jong ka kam thoh khubor, ki jinghikai ba man ka por bad ki jingleit pynpaw pyrthei jong ki nongthoh khubor.
U Myntri Rangbah u la ban jur ruh ia ka jingdonkam jong ka jingkynthoh kaba bha kaba long ka rukom kaba koit ba khiah ha ka synshar paidbah. U la bynrap ba ha kane ka juk mynta namar ka jingstad saian ka donkam bha ban buh bud hapdeng ka jingtip bad ka jingmut bad ki khubor.
Shuh shuh, u Myntri Rangbah ka Jylla u la pynpaw ruh ïa ka jingdonkam jong ka jingshaniah ha ka kam thoh khubor. “Ngi lah ban pynlong ïa kiei kiei kiba sngewtynnad tang shipor hynrei ban pynneh ïa ka jingshaniah ka dei kaba ngi baroh ngi dei ban ïaleh katba ngi nang ïaid shakhmat bad nga ngeit ba ka jingshaniah ka dei ka bynta kaba kongsan tam jong ka kam thoh khubor.
Ha ka jingpynkut u Conrad Sangma u la ai jingiarap pisa na ka Chief Minister Special Grand ba mar shilak sha 8 ngut ki Nongthoh khubor kiba la rangbah bad kiba shah pynkup burom mynta ka sngi.
Ha ba ai jingkren kum ka symbud kongsan ka Dr Ampareen Lyngdoh ka la ong, ka seng ki lad pathai khubor ka peit sha ka sorkar na ka bynta shibun kiei kiei bad ngi sdang mynta ka sngi ban bat kti ia ki lad pathai khubor bad ban peit ia ki lad ki lynti ha kaba ngi lah ban pynbha ia ka jingim bad ka kam ka jam jong ka kynhun ki nongthoh khubor bad ithuh ia ka jingtrei shitom kaba ki nongthoh khubor ki trei.
