U Myntri Rangbah ka Jylla u Conrad K Sangma ha ka jingkren plie ïa ka ïing treikam jong ka Mallangkona Police Outpost, kaba hap hapoh ka Mawshynrut Civil Sub-Division, West Khasi Hills District mynta ka sngi ula ong ba ka jingshong shngaiñ bad ka jingai jingïada ïa ki nongshong shnong jong ka Jylla ka dei ka kamram kaba ha khmat duh jong ka sorkar.
U Conrad ula ong ba kane ka Police Outpost (PO) ka dei kawei na ki jingdawa ba la slem bha jong ki nongshong shnong ka Mallangkona. U la ong ba ka jingpynmih ïa kum kine ki PO ba thymmai ha ki thaiñ ba kham mih ki kynrum kynram, kan ïarap shibun ban wanrah ïa ka jingshong shngaiñ jong ki nongshong shnong. Namar kane ka jaka ka hap ha ki bynta khappud bad ka Jylla Assam. Ha kaba ka sorkar Jylla kala pyrshang barabor ban ïakren bad ka sorkar Assam ban pynneh ïa ka shongsuk shong saiñ hapdeng ki nongshong shnong na baroh ar liang la ong u Conrad.
Shuh shuh u Myntri Rangbah u la ong ba ïa kane ka Mallangkona Police Outpost la tei lyngba ka skhim PIRF (Police Infrastructure Renovation Fund) kaba la sdang treikam naduh u snem 2019. Lyngba ka ne ka skhim la mang pisa Rs.17.5 lak tyngka na ka bynta ban tei ïa ka ïing treikam jong kane ka PO. Kane ka skhim ka dei kaba ki SP ki lah ban pynlut ïa ki jingdonkam hapoh ka bor jong ki, khlem da hap ban pan bor na ka State Government.
Na ka liang jong u Myntri Rangbah ula ai ka jingïaroh ïa ki nongshong shnong jong ka Mallangkona kiba la mih shakhmat ban ïa synniang lem ha kaba trei bylla sngi bad ruh ban pynïoh ïa ki mar ba donkam ban tei ïa kane ka ïing.
Kiwei de kiba ïadon lang ha kane ka prokram plie ki kynthup ïa u Symbud Myntri Rangbah ka Jylla u bah Prestone Tynsong, u MLA ka thaiñ u R. Momin, ka DGP ka Jylla kong Idashisha Nongrang, u Gigur Myrthong bad kiwei de ki sahep sorkar.
