U wei na ki nongwad RTI na ka shnong Khliehmyntriang, East Jaiñtia Hills District u bah Lektor Dkhar ha ka 5/6/25 u la wan ha Shillong Press Club haba iadei bad ka jingwad Right To Information( RTI ) halor ka jingbym iahap ia ka rukom pyntrei ia ka surok Jalyiah sha Mookhep Bypass.
Haba kren sha ki lad pathai khubor hadien ba lah ioh ia ka jubab lyngba ka RTI u la ong ba ka long kaba lyngngoh ba la nang pynrit shuh shuh ia ka surok bypass na Jalyiah sha Mookhep na kaba ka julong kata na ka 7.00 m sha ka 5.50 m.
U la bynrap katkum ki jubab ba ioh na ka ophis u Executive Engineer PWD (Roads) Khliehriat Division, lyngba ka RTI, u bah Lektor u la pyntip ba ka jingmang pisa ban maramot ia kane ka surok kaba 7 km ka dei 3 klur tyngka bad ba la ai pyntrei sha ar ngut ki kontraktor kata u Bah Rimiki Tlang bad ka Kong Robina Swer.
Shuh shuh u la pyntip ba ka jingsiang rong ia katei ka Surok la buh 20 mm ka jingrben hynrei ha ka jinglap pat la shem ba tang hapoh 10 mm la siang ia ka rong.