Da u K.L. Pariat
Mynta, Ngi dei ban pyrkhat sani bha hashwa ba ngin pyndonkam ïa ki mar ka Meirymew bad ngi dei ban pynbiang tarajur hapdeng ka jingpynneh bad ka jingshna ka jingmaramot ha ka kam pynroi.
Man la ki briew ha ka shnong ka Ri ki dei ban pynleit Jingmut bha ban pynduna ka jinglong Rhah bad dei ban tei ïa ka jinglong ban don ka jingkitkhlieh ban imlang ha ryngkat bad ka Meirymew.
Baroh ki dustur ki riti jong ki Jaitbynriew ha satlak ka pyrthei ki ñiewkor bha ïa ka Meirymew. ki dieng, ki Wah, ki Lum, ka Um, ka ding ki dei kiba kyntang bad ki pynkyntang bha ïa ki.
Ïa ki Wah ki ainguh kum ka Kmie bad ïa ka Mariang ki sngew kum ka Blei. Kane ka Akor ban ñiew Kyntang ïa ka Mariang, mynta la dei ban pynkhie im sashisien ha kine ki por ki sngi ba thymmai.
Ha ka jingshisha, ka jingkhwan jingrhah u bynriew bad ka jingeh dohnud, ka jingbymsbun ka dei ka daw tynrai jong ka jingsniew ka jingjakhlia ka Mariang.
Ka jingkhwan lalot ban kloi ka jingïohnong khambun, ka pynjulor bha ïa ka jingïadei ki jynthaw ba don jingim bad ym tang ka pynjakhlia bad punjulor ïa ki jingthaw hynrei ka aibor ïa ka jingsngew bym treh ne kyntait ban pdiang da kita kiba halor kiba don talawiar ka Mariang.
Ngi donkam ban pynkhie im sashisien ïa kane ka jinghikai jong ki Longshwa Manshwa ban pynkhlaiñ ïa ka jingïadei ka jong ngi ki bynriew bad ka mariang. Ïa ki Briew dei ban pynshlur ban Kyntang ïa kane ka pyrthei ban ñiewkor para Briew kum ki jingthaw ba kyntang bad ban ïohi ïa u Blei ha ka Mariang.
Kane ka pynshlur bad ka pynkloi ïa ka jingsngewthuh. Tang ki Briew kiba sngewthuh ïa ka jingïadei ki Briew bad ka Mariang kiba lah ban Kheiñkor ïa ka Mariang bad kiba sumar ïa ka Meirymew.