Ki nongialam ryngkat ki nongkyrshan jong ka Indian National Congress (INC), Shillong, hynne ka sngi ka 4 Nailar 2025, ki la mih shakhmat na ka bynta ban pynrem ia ka Sorkar pdeng kaba la ialam da ka BJP na ka bynta ka jingleh shiliang ha ka rukom synsar khamtam ka jingñiewbeiñ ia ki Khristan bad ki rit Paid.
Ha katei ka jingmih surok kaba jai jai ryngkat ki plakad, ki Nongialam Congress ki la pynpaw ia ka jingdiaw halor ka jingleh matlah jong ki nongialam ka BJP da kaba pynlong ba ka Politic kan ktah bad wanrah ia ka jingsngewpher niam. Kane ka jingpynrem ka dei ruh hadien ka jingshahkem 2 ngut ki nongialam Niam (sister) jong ka Balang Catholic ha Chattisgarh ia kaba ki la shah kynnoh khlem nongrim ba ki la pynkylla niam jubor ia katto katne.
Ka Congress ka la buh ruh ka jingkylli ia ka BJP ba kumno ki paralok Hindu kiba sah ha Meghalaya ki heh mynsiem bad im ha ka jingsuk katba kiwei ki riewngeit Khristan ha kylleng ka India ki shah khniot, shah lehbeiñ bad ym don ba shimkhia la ka long na ka Sorkar ne ki Bor Pulit. Ki Nongialam ka Congress ki la iathuh ruh ba kane ka jingiakhih kam dei eh tang na ka bynta kaei kaba la jia ha Chattisgarh hynrei ka dei ka jingpynkymaw iaka jingshah leh shiliang na ka por sha ka por ha kylleng ki Jylla.
Haba ai jingkren ha kane ka sngi, na ka liang u Bah Manuel Badwar, Secretary MPCC, u la ong ba dang shen ki riewngeit Hindu ki la ioh ban rakhe ia ka Yatra bad la ai ia ki ban pyndep ia ka jinglehniam “ngi sngewthuh ba ka Jingiatylli ka dei ka bor bad kaba pynlong ia ka Ri kaba shi tylli. Shuh shuh u la ong ba ka politik kadei kaba la wanrah ka jingphiah ia kane ka Ri ha kiba bun bynta. “Ngi kum ka Congress ngi ieng pyrshah ia kane bad ngin ym ailad ia kum kine ki jingsngew ba kin don. Baroh ki jait Niam, ki jait bynriew kiba don ha kane ka jylla kim dei ban ailad ia kum kine kin jia. Ngi donkam ban iatylli na ka bynta ba ka ri kan kiew” ong u Bah Manuel.
