Shi bynta ban rakhe ia ka sngi “World Tourism Day” u Myntri Rangbah ka Jylla Conrad K. Sangma u la leit ban ïashim bynta ha katei ka program ha kaba u la pynbna ruh shibun ki projek, ki skhim, ryngkat ka jingpyllait ia ka Kali Tourism na ka bynta ban pyndonkam ia ki Nongwanjngoh kai Pyrthei.
Haba ai jingkren ha kane ka sngi, u Myntri Rangbah u la ong ba naduh 7 snem mynshwa ba ka Sorkar ka la shimkhia bha ia ka kam jngohkai pyrthei la iohi ia ka jingkiew ka kam bad kata kam dei ban myntoi tang na ka bynta ki nongwan ha kane ka Jylla hynrei na ka bynta ki paidbah ia kaba la sakhi ia ka jingiohkam jong kiba bun. U Sangma u la iathuh ruh ba naduh ba la shimkhia da kane ka Sorkar, ka jingiohkam ka la kot palat 50 hajar bad ka thong ha kine ki 3 snem ruh kan long sa 50 hajar ka jingpyniohkam lyngba ka kam Jngohkai pyrthei.
Shuh shuh u la iathuh ba tang ha u snem 2023 ka jingwan tuid ki nongwanjngohkai Pyrthei na kylleng ki jaka ha India ka la kot haduh 14 lak bad katkum ka jingioh jingkheiñ haduh u snem 2024 la kot haduh 16 lak katba kiba wan na shabar ri ki long 2 lak ha u snem 2023 bad 2.3 lak haduh u snem 2024.
Ym tang katta ban nang kyntiew shuh shuh ia ka kam Jngohkai pyrthei bad ban pynioh kam ia ki paidbah ka Jylla, la pyllait ruh ia ka skhim na ka bynta ban shna ia ki Homestay bad ia ka projek kiba la kot haduh 210 tylli ia kaba yn pynlut haduh 3625 klur.
