U Symbud Myntri Rangbah ka Jylla, Bah Sniawbhalang Dhar uba dei ruh u Myntri ba khmih ia ka Tnad Pynroi Sor u la iathuh ba ka Sorkar Jylla dang shen ka la iakren bad ka Tnad Defence Ministry ka Sorkar Pdeng ha kaba iadei bad ka kynrum kynram ha Them Metro lane ia kaba la ju khot ruh ka Harijan Colony ha kaba kane ka kam ka dang iaid mynta da ka jingkhmih lynti ruh ia ka jubab ba biang na ka Tnad Defence.
Kum ban shu pynkynmaw, ia katei ka jaka sah la ai tang na ka bynta ki nongtrei Municipal hynrei katkum ka jinglap jong ki Seng bapher bapher, ia katei ka jaka la pynlong shnong da ki briew ki bym dei hok ban sah ha kaba man u snem la tei ïing be-ain khlem ki kot ki sla ba tikna. Kumta, namar ka jingbym hun jong kiba bun, ki paidbah ka Jylla ki la pynbor ia ka Sorkar na ka bynta ban weng noh ia kitei ki briew ba sah ha katei ka jaka bad pynkynriah sha kawei pat ka jaka.
U Myntri u la iathuh ba watla kane ka kam ka dang iaid mynta ha ka jingiakren, na ka liang ka Sorkar jylla ruh kam shong kli kti hynrei ka dang pynlong ia ka jingbishar na ka bynta ban ai ia ka jubab kaba biang bad ka ban ia hun lang baroh ar liang ryngkat ka jingiatreilang bad ka ïing Kashari.
U Bah Sniawbhalang u la ong ba kane ka kam ka long kaba kham khia, kumta kan kham shim por bad haduh mynta ym pat lah ban ai ka jubab ba biang lano bad haei yn pynkynriah ia ki.
