U Myntri ba khmih ia ka tnad PHE ka jylla, u Marcuise Marak hynne ka sngi ka 24 tarik Ïaiong 2025 u la pynshai paidbah halor ka jingshah kynnoh ba ka jingpyntrei ia ka skhim Jal Jeevan Mission (JJM) ka jur bha ka jingbamsap bad ki kam buhrieh ha kaba la kynnoh ruh ba don ki jaka ba la dep ban pyntrei bun bnai haduh mynta kim poi um bad don ruh ki jingtrei torti. La shah kynthoh ruh ba ka jingpyntrei ka suki bha khamtam ha ki thaiñ Nongkyndong.
Ha kaba iadei bad kane ka mat, u Myntri u la iathuh ba kawei na ki daw ba Kongsan hi ka dei ba duna um na tyllong bad don ki jaka bym poi um ka dei na ka daw ba duna slap. “Kam dei ka jingbamsap hangne, nga tharai ka don ka jingsngewthuh bakla. Ki projek ki dang iaid shaid shaid, ki kam ruh ki dang tyllun bha kumba ju long. Ka daw hi kadei na tyllong um bad mynta ngi dang iaksaid bad kane ka jingeh” la ong u Marak.
Shuh shuh u la ong ba ka Sorkar ka shimkhia halor kane ka jingeh bad ki don ruh ki kynhun kiba la buh ban khmih bniah ia kane ka mat ban pyntikna ruh ba kan ym don kano kano ka jyrsieh na ka skhim JJM. Nalor kata, u la iathuh ruh ba haba pyntrei ia kano kano ka kam ki don shibun ki jingeh khamtam ha ka skhim JJM. Ban pyniaid ia kano kano ka Projek hap ban ïakynduh bad iabeit shwa ruh bad ki trai jaka lane lada dei jong ka tnad Forest hap ban ioh jingbit ba tikna bad kane ka shim shibun ka por ban pyndep, ong u Marak.
U Myntri u la iathuh ruh ba kawei na ki daw ba sahkut ka kam ka dei na ki kontraktor kiba la shim ban trei ha ki katto katne katne ki jaka bad kiba la sangeh noh shiteng lynti.