Ka long shisha ka jingsngew sarong ïa ka jaid bynriew, ka Jylla bad ka ri India hi baroh kawei ha kaba u Bah Donbor Rumnong u Samla Rangbah napoh ka Jylla Meghalaya u la wanrah ïa ka nam bad ka burom da kaba ïoh rah ïa ka nam kum u lahduh ïa ka Mr. Asia Pacific Body building Championship 2024 ba la pynïaid da ka World Fitness Federation kaba la sdang naduh ka 31 tarik u Nailar haduh ka 2 tarik Nailur ha TIU Theatre, Makati city Phillippines.
U Bah Donbor Rumnong u la leit ban mih khmat ïa ka ri India ha ryngkat ki 6 ngut kiwei pat nangta 9 ngut ki Official bad ha ka 5 tarik Nailur u Bah Donbor Rumnong ha ryngkat ka kurim jong u ki la wanphai noh sha la ka jong ka Jylla ïa kaba la pdiang sngewbha ïa u da kiba haïing hasem ha Mawlai Nongkwar Block 6.
Haba ïakren Sha ki lad pathai khubor mynta ka sngi u Bah Donbor Rumnong u la ïathuh ba kam long kaba suk ban ïoh rah ia ka nam lahduh namar u la hap ban ïeng rynsan lang bad ki nongïalehkai jong kiwei pat ki ri kiba kham heh met, hynrei u pynpaw da kaba ong ka jingtrei shitom bad ka jingminot ka wanrah ia u soh ka jingjop.
