Mynta ka sngi ka Jaiñtia Students Union (JSU), Syndai Unit hapoh ka jingialam u Vice President u Samla Bankerlang Lamurong bad u General Secretary samla Mebanri Suliang ha ryngkat ka jingdon lang u Rangbah Shnong ka shnong Syndai Mission u Rangbah Nason Mynthlu ki la leit ban kynduh ia u DC jong ka West Jaiñtia Hills halor ka jingthut ba khah khah jong u Network Airtel kaba don ha shnong Syndai Mission.
Ka Seng ha ryngkat ka shnong ki la kyrpad ia u DC ban tuklar lem ia kane khnang ba kan long ka jingmyntoi ia baroh ki nongshong shnong jong ka shnong Syndai bad ki marjan shnong baroh namar ha kane ka juk stad kaba mynta ka network ka long kaba donkam bha ia baroh ban pynsted ia ki kam ki jam ha baroh ki liang khamtam ia ki samla pule kaba pynsuk ia ki ha kaba iadei bad ka kam pule jong ki.
Kum ban shu pynkynmaw ka JSU ha ki snem ba la dep ka la dep ban complaint ha ki bor ba dei peit jong ka Airtel Company halor ka jingthut bad ka jingtlot jong ka internet connection hynrei kumba ka long mynta ka network ka neh hi kumjuh, kumta ka seng kam banse ban leit ujor noh shisien don sha u DC ka District.