U Myntri ba peit ia ka tnat Social Welfare u Bah Paul Lyngdoh, ha ka 10 tarik ïaiong haba kren sha ki nongthoh khubor halor ka jingiakhih jong ka AIM hynnin ka sngi pyrshah ia u Addhaar u la ong ba ki don katto katne ki tnat jong ka sorkar pdeng kiba bthah ba ki paidbah ki dei ban leh ia u Aadhaar ban ioh ia ki jingmyntoi na ka tnat jong ki.
U la ong ruh ba ka jingpyntreikam ia ka Aadhaar ka long na ka bynta ki jingmyntoi ba ki paidbah kin ioh bad lada ym pyndon kam kumno ngin lah ban ioh jingkhein ia kiba ioh jingmyntoi.
U bah Paul u la ong ruh ba ka jylla Meghalaya ka dei ka jylla kaba dang duna bha ki ba pynrung ialade ha ka Aadhaar hynrei ki wei ki jylla ha kylleng ka ri ki la dep naduh kine ki snem ba la dep.
U bah Paul u la buh jingkylli ruh ha kano ka nongrim ban pyrshah ia ka jingpynrung Aadhaar. U la ong ba ym shym la don mano mano ruh ban pynbor ban leh ia u Adhaar, kito ki bym shym treh ban leh ia u Aadhaar kim lah ban ioh jingmyntoi ban apply ia kino kino ki skhim jong ka sorkar, baroh ka shong ha ki paidbah.