Ka Seiñraij Higher Secondary School, Jowai ia kaba la seng naduh u snem 1964, ha kane ka 9 tarik Nohprah ka la rakhe iaka Diamond Jubilee ne jingdap 60 snem ka jingïaid lynti bad ka jingshakri jong ka skul haka pule puthi bad sam jingnang jingstad ia ki khynnah.
Ha kane ka sngi la donlang ka Joint Director of School Education & Literacy bad Incharge DSEO West Jaintia Hills District kong A.P. Syiem kum ka kongsan, ka District Mission Co-ordinator, West Jaintia Hills District, Jowai ka kong M. Lakiang kum ka symbud kongsan, kiba shah khot sngewbha, ki nonghikai bad ki khynnah skul
Ka kong A. P. Syiem haka jingkren, kala iaroh iaka jingai jingshakri jong kane ka skul na ka bynta ban kyntiew iaka pule puthi bad jingnang jingstad jong ki khynnah. Ka la ai mynsiem shuh shuh iaki nonghikai, ka la ong ba ka lawei jong ka imlang sahlang, ka District, ka jylla bad ka pateng ban dangwan la pynshong nongrim lyngba ki nonghikai kiba pynwandur bad saiñdur iaka jingim jong iwei pa iwei ki khynnah skul.
Kala pynshlur ruh iaki khynnah skul ban kitkhia haki jingpule ki jong ki, khamtam hakum kane ka juk jong ka jingialeh kaba ka jingnang jingstad ne kata ka Sceince & Technology ka donkam bha iaki khynnah ban trei shitom.
Ka Principal jong ka skul ka kong Wompher Laloo haba pynsngew iaka histri jong ka skul, kala ong ba la sdang na ka ME Section ha u snem 1964 bad ha u snem 1970 la sdang iaka Primary Section. Ha u snem 1984 la pynkiew kyrdan shaka High School kaba tip mynta kum ka Secondary Section. Ha u snem 1994 haka por ka jinglong MLA u Dr. RC Laloo iaka Secondary la pynkiew shaka Deficit pattern bad ha u snem 1996 la ioh iaka jingithuh kaba pure iaka skul da ka tnad Education ka sorkar Jylla.
Hashwa kane la ioh ka jingkren pdiang na u ma Mariyoo Rymbai Headmaster UPS Secretary Diamond Jubilee, Secretary SMC Ma CA. Ram Kyndiah, kong E. Shilla Head Teacher Lower Primary School. Ha kane ka sngi la donlang ruh u President SRJ ma Hercules Toi, General Secretary Ma Arwotki Sumer bad kiwei. La pynphuh pynphieng shuh shuh ia kane ka sngi da ki jingshad jingrwai ba la shim bynta da ki khynnah skul.