Ka Dorbar Mang Tyngka (Budget Session) jong ka Jylla ka la iaid mynta la 6 sngi bad katkum ka jinglum jingtip lane ka Kaiphot (Report) kaba iadei bad ka Dorbar ha ka 7 Tarik Lber 2025 ki long kumne – Ka jingbuh jingkylli jong u Rupa M.Marak MLA ka 49- Dedenggre, West Garo Hills District na ka seng All India Trinamool Congress (AITC), kaba ong “hato la leh ei ei ne em ha kaba iadei bad ka jinglait tuh jong ki kot jingkylli eksam (question paper) jong ka MTET kaba la jia ha ka snem 2019”?. Na ka liang u Rakkam A. Sangma, Myntri ba khmih ia ka tnad Pule Puthi ka jylla, u la iathuh ba ka tnad ka la dep ban ioh kem ia ki briew kiba la leh ia kane ka kam, kata 11 ngut bad kiba don kti ban pyndonkam bad ban don kti ki long 14 ngut. Shuh shuh u la iathuh watla ia kine ki kot jingkylli la print ha Guwahati hynrei kane ka kam bymman ka la pynsniew ia kiba bun watla ka tnad ka la ialeh katba lah ban buhrieh.
Kawei pat ka kaiphod ba la iohlum ha kane ka Dorbar ka long halor ka Kad liengsuiñ – Baljek, Jengjal Airport.
Ha kaba iadei bad ka jingbuh jingkylli jong u Rupa M.Marak MLA ka 49- Dedenggre, West Garo Hills District na ka seng All India Trinamool Congress (AITC), u Bah Sniawbhalang Dhar uba dei ruh u Myntri ba khmih ia ka tnad Urban Affairs Tnad Transport, tnad Commerce & Industries u la wanrah ia ka jingkheiñ ha kaba iadei bad ka jingpynlut ia ka jaka shna ia katei ka kad liengsuiñ kaba la kot haduh 3,57,97,775 klur bad ka jingheh kaba 211.13 akar bad 153.13 akar. U Bah Sniawbhalang u la iathuh ba ka kane ka Projek la wan naduh u snem 1986 bad na ki daw ba bun jait ka khlem pat treikam haduh mynta. U Symbud Myntri Rangbah ka jylla u la pyntikna ruh ba ka la don ka jingiakren bad ka Airport Authority of India na ka bynta ban pynurlong noh kham sted ia kane ka kam. Nalor kata, u la kdew ruh ba kawei na ki dieng pynkiang ba khlem pat treikam kane ka kad liengsuiñ kaba la don kyrteng mynta ka 17 snem, kadei ba ym pat ioh ia ki nongpyniaid (operator) kiba tikna.
Haba phai pat sha ka jingkylli ba la buh da u Bah Heaving Stone Kharpran MLA ka Mawryngkneng Constituency (VPP) kaba ong “Hato ka Sorkar ka la ai ia ka jingïarap (financial assistance) sha ki lanot lane ki longïing kiba la ngat ha ka jingpluh ïing, ki jingshah lyngshop ha ki eriong bad kiwei kiwei ki jingshah ktah ha ka mariang, kaba nyngkong – sha i Kong Midaris Pde, na ka shnong Kut kaba la jia ha ka 29.12.2024, kaba ar – sha i Kong Riburom Kharsngi Puriang kaba la jia ha ka 2.12.2024.
Ha kaba iadei bad kane, u Bah Kyrmen Shylla uba dei ruh u Myntri ba khmih ia ka tnad Revenue & Disaster ka Sorkar Jylla u la wanrah da ka Kaiphot kaba long kumne – ia ka lad jingïarap sha kine ki 2 ïing la pyllait ha ka 18.2.2025.
Shuh shuh u la wanrah ruh ia ka kaiphot kaba kdew ia ki longïing kiba la ngat ha kane ka apot ha u snem 2023-24 ki long 31 ïing (Tang ha East Khasi Hills) bad ka jingïarap kaba la kot haduh 7,25,00/- bad 24 tylli ki longïing ha u snem 2024-24 ryngkat ka jingïarap kaba la kot haduh 29,19,900/-. U Bah Shylla u la pynshai ruh ba ka tnad ka pyllait ia ki phon (fund) katkum ka bhah jong ka SRDF bad ym lah ban iaid palat ia kata bad lada ka Sorkar ka kwah ban bteng ia ka jingiarap kan don da kawei ka lynti. U la pynshai ruh ba ym don kano kano ka bhah kaba la buh tyngka ban pynlut kyrpang (specific amount).