Ka Shad ñiam Behdeiñkhlam jong ka Seiñ Raij Jowai mynta ka sngi (Sngi Muchai) kala poi noh sha kaba kut hapdeng ka jingiphuh iphieng ba la shim bynta da ki khun ka Raij Jowai ha ka jingwan sakhi lang ki hajar ki khun ka niam Tre na ki bynta bapher bapher jong ka ri lum Jaintia bad kiwei de ki nong wanpeitkai na shabar jong ka District bad ka jylla.
Baroh ki Rot kiba la wan pynpoi mynta hapoh ka Syiem Aitnar ki don haduh 13 tylli. Ïa kine ki Rot la wan rah na ki dong bapher bapher hapoh ka Raij Jowai kumjuh na ka Seiñ Raij Ummulong bad ka seng Khasi Seng Kmie na Shillong. Kine ki rot ki don ïa la ka jong ka jong ka jingmut ne ka khubor ba kynthup ka jingïada ïa ka mei mariang ban lait na ki jingjaboh, ka pyni ka jingkitkhlieh jong u Kñi ha ka ïing ka sem, kumjuh ka jingngop ha ka jingpyndonkam palat ïa ka Mobile Phone, ki jingdih ba sniew, bad kiwei kiwei de.
Ha kane ka sngi pynkut ïa ka Behdeiñkhlam la wan ban sakhi lang da u Arjun Ram Meghwal Minister of State for Parliamentary Affairs & Culture jong ka sorkar kmie, u Chief Justice ka Meghalaya High Court u Sanjib Banerjee, u MP ka Rajya Sabha Dr. Wanweiroy Kharlukhi, u shongknor ka ïing dorbar thawaiñ ka jylla bah Metbah Lyngdoh, u Director General of Police ka jylla u Dr. Lajja Ram Bishnoi, IPS, u myntri sorkar bah Shanbor Shullai, ma Kyrmen Shylla, u President ka BJP Meghalaya bah Ernest Mawrie, ki ophisar sorkar nalor ka jingdonlang u President ka Seiñraij ma O. R Challam, General Secretary ma A. Sumer lem bad kiwei de ki kynrem ki lyndan.
Katba ha ka por janmiet la don ka Datlawakor hapdeng u Langdoh bad u Sangot Paswet ha ka jingïaleh ka kynhun u Langdoh kala long ka nongjop kaba mut ba u kba u khaw un khambha sha ka thaiñ pynthor wah mynta u snem.
Na ka liang u President ka Seiñ Raij ma O.R Challam ula ai khublei kyrpang ïa baroh kiba ïadon bynta lang ha kane ka lehniam Behdeiñkhlam mynta ka snem 2022 hadien ar snem khlem da ïoh lad satia ban ïa shim bynta laidluid jong ki khun ka raij, da kaba u ai khublei ruh ïa ki tnad sorkar kiba la pynïaid beit pynïaid ryntih ïa kane ka Behdeiñkhlam mynta ka snem.
Kham hashwa ha ka por dang step mynta ka sngi kala don ka jingkynting khnong ha ïing ka Langdoh.
