Ka liengsuin C-17 jong ki shipai US Air Force, ka la poi ha Amritsar, ha kaba ka la kit ia ki 112 ngut ki nong India, kiba la shah beh na US, na ka daw ba ki shong beaiñ. Kane ka dei ka jingwan kaba lai ha ki 10 sngi hapdeng ki jingpynshitom beiñ jong ka US ïa ki nongwan buhai shnong.
Ka liengsuiñ jong ka US Air Force C-17 Globemaster ka la hiar ha Amritsar International Airport ha ka por kumba 10 baje eiei mynstep. Kane ka dei ka sien kaba lai kum kane ka jingwan poi ha kine ki 10 sngi ba ladep kum shibynta jong ka jingkhynra jong ka sorkar America ba la ïalam da u Donald Trump President ïa ki nongwan buhai shnong be-aiñ.
Katkum ki tyllong khubor la ioh lum na ki 112 ngut kiba shah beh, 44 ngut ki dei na Haryana, 33 ngut na Gujarat, 31 ngut na Punjab, 2 ngut na Uttar Pradesh, bad mar uwei na Uttarakhand bad Himachal Pradesh.
Ki bahaïing jong ki katto katne ki poiwir ki la poi ha Sri Guru Ram Dass Jee International Airport ha Amritsar ban pdiang ïa ki.
Hadien ba la pyndep ia baroh ki jingdonkam, kynthup ia ka jingwan rung sha ka ri, ka jingpynshisha, bad ka jingpeit bniah ia ka jinglong tynrai, yn shah ia ki nongshah beh ban leit phai noh sha la ïing. Ki bor pyniaid ki la pynbeit ruh ia ka leit ka wan sha la ki jong ki jaka ba ki leit.
Ha ka miet jong ka sngi Saitjaiñ, ka liengsuiñ shipai US kaba ar kaba kit ïa ki 116 ngut ki nongwan buhai shnong beaiñ na India, ka la hiar ha ka kad liengsuiñ jong Amritsar, ha kaba ki shynrang napdeng kiba la shah beh ki la kam ba ki don ha ki jingteh jingkhum ha baroh kawei ka jingleit liengsuiñ bad la kynnoh ba ki samla Sikh kim don ryndang.
Na kitei ki 116 ngut kiba shah beh, ki don 65 ngut na Punjab, 33 ngut na Haryana, 8 ngut na Gujarat, mar arngut na Uttar Pradesh, Goa, Maharashtra bad Rajasthan bad mar uwei na Himachal Pradesh bad Jammu and Kashmir.