Ka shnong Madanrting ka dei ka shnong kaba nyngkong eh kaba hap hapoh ka Census town bad ka ban ioh jingmyntoi naduh mynta lyngba ka skhim bylla 100 sngi ne ka Mahatma Gandhi National Rural Employment Guarantee Scheme (MGNREGS).
U MLA/ MDC jong ka Nongkrem Constituency u bah Lambor Malngiang u la plie pyrda ia u mawnongrim jong ka jingsdang ban pyntreikam ia kane ka skhim mynta ka sngi ha ka jingialang kaba la long ha Dorbor Shnong Madanrting.
U bah Malngiang ula pynpaw ba ka jingailad jong ka sorkar ia kine ki shnong ban ioh pyntrei ia kane ka skhim kan long ka jingkyrkhu bah ia ki nongshong shnong. Lyngba kane ka skhim kan wanrah ia ka roi ka par ha ka shnong ka thaw bad ka ioh ka kot ruh kumjuh. U kyntu ia ki nongshong shnong bad ki nongialam shnong ban pyntrei hok ia kane ka skhim jong ka sorkar pdeng.
La iadonlang ruh ha kane ka sngi da i Deputy Commissioner ka East Khasi Hills District i kong Isawanda Laloo. I kong Laloo ila pyntip ba kin don haduh 29 tylli ki shnong kiba don ha ka Census town hapoh East Khasi Hills District kin ioh jingmyntoi noh na kane ka skhim. Ka la ong ruh ba ki don haduh 260 tylli ki jait jingtrei lah ban pyntrei lyngba kane ka skhim.
Kiwei de kiba ai jingkren hakane ka sngi ki kynthup ia u bah Latiplang Kharkongor, MDC Nongthymmai Constituency bad bah P.T. Passah BDO Mylliem C&RD Block.
