U Myntri ka Sorkar Pdeng u ba khmih ia ka Tnad Jal Shakti u Raj Bhushan Choudhary u la wan jngoh ia ka jylla Meghalaya ban peit bad khmih halor ka jingiaid beit iaid ryntih ka Scheme Jal Jeevan Mission bad ki kam pynroi hapoh ka jylla.
Haba ia kren sha ki lad pathai khubor mynta ka sngi (23 tarik u Nailar 2024), u Raj Bhushan u la ong ba ka jylla Meghalaya ka dei ka jylla ka ba itynnad ha ki sawdong sawkun ka Mei mariang, ka long ruh ka jylla ka ba riewspah ha ka riti ka dustur bad ha ka spah mariang kumjuh.
U Raj Bhushan u la ong ruh ba na ka liang jong u, un ia kren sha ka sorkar pdeng ba kan theh ki kam pynroi ha ka jylla Meghalaya ha kaba ia dei bad ki jingtei, ban pynbha ia ki lynti ki surok, ban kyntiew ia ka kam jngohkai pyrthei, ban pynkupbor ia ki samla bad kumjuh ia ki longkmie, ban kyntiew ia ka rep ka riang bad ka roi ka par ha ki thaiñ nongkyndong.
