Ka Khasi Students Union (KSU) mynta ka sngi ka 17 tarik Naitung ka la ïoh ban rakhe ïa ka lyngkhuh sngi ïap kaba 189 jong u Pa’iem Tirot Sing Syiem ha khmat u mot ba shirynieng jong u uba don ha Madan Iewrynghep, Laitumkhrah, Shillong ha ka por 10 baje mynstep.
Ha kane ka sngi la wan ba iashim bynta lang da ki nongialam ka FKJGP, HNYF, RBYF, JSU bad HITO kynthup ruh na ka liang ka Dorbar Shnong Laitumkhrah, Seng Samla Laitumkhrah, ki nonghikai bad samla pule ka PGT college, ki tyngshop bad puron ka Dhaka Escape bad kiwei kiwei.
Ha ka jingkren jong u President barim ka KSU, u Bah Lambokstar Marngar u la pynpaw ïa ka jingkordor bad ka nongrim ba la buh da u Syiem Tirot Sing. Ha kaba iadei bad ka thong jong ka KSU kaba la shah theh um pjah ha ki nongsynshar, u Bah Marngar u la ong ba ka seng kan ym kynran dien ban khynra ïa ki bar jylla ki bym don ïa ki kot ki sla kiba biang watla ka sorkar ka la khang tyngeh naduh 6 tarik mynta u bnai ba ki la sdang ïa kane ka jingkhynra. U la ong “Ka mynsiem ïaleh bad ka mynsiem lenlade u Tirot Sing kam pat sarang haduh mynta”. U la kdew ruh kumno ba ka sorkar India ka la leh kyllut halor ka jingdawa ban pyntreikam ïa ka ILP.
“Kaba sngewsih ka long ba wat ïa ki aiñ ba la don lypa ruh ka sorkar ka ong bym don aiñ” ong shuh shuh u Bah Lambok. U la ai mynsiem ruh ïa ki samla ba kim dei ban phaidien na kane ka jingïaid lynti. Ha kaba iadei bad katei ka jingkren u la ai nuksa ïa u Tirot Sing kumno ba u la pyndep ïa ka thong khlem da pyndem haduh kaba kut.