Ka Federation of Khasi Jaintia and Garo People’s (FKJGP) – Khliehriat Circle ka pynpaw ia ka jingpyrshah kaba jur ha ba iadei bad ka Public hearing jong ka Star cement kaba la pyllong haka 29/01/2022 haka Shnong Lumshnong katkum ki jingiohi ha ki katto katne ki Ladpathai khubor ba ka Starcement ka don jingthmu ban pynheh iaka pynmih khyndew-bilat, katei ka Company kan pynieng ia ka Line-II (Ban pynmih Clinker 3.3 MPTA, Cement 2.0 MPTA bad ka WHRB 15.5 MW) bad katei ka Company Cement ka don jingthmu ruh ban pynheh ia ka jing pynmih ia u Clinker, khyndew-bilat ka bording bad ka par Mawshun, ka seng ka pynpaw ruh ka jingsngew lyngngoh ba ka Star cement ka klem pynmih iaka kyrteng jaka kaba kan sa pynheh iaka Par Mawshun jong ka.
Na ka liang jong ka ong ba ka jingpyrshah jong ka seng ka long ba kane ka Public hearing kaba pyllong mynta ka kynti kam shym la long kumba ju long kiwei ki Public hearing kiba la dep namar ba kane ka Public hearing mynta ka khlem pynbna shwa sha ki lad pathai khubor hashwa ban pynlong ia katei ka Public hearing khnang ba ki paidbah kiba pyrshah lane kyrshan kin ioh lad ban pynsngew ha katei ka sngi.
Kane ka jingleh ka Star cement bad katto katne kiba don haka bor kadei ka jingplan lypa khnang ba kiba pyrshah kin ym ioh lad ban wan pyrshah dei na kine ki daw ba ki burieh bad kiar naka jingai jingtip lypa, ia kum kitei ki public hearing ngim lah ban ong ba ka dei ka Public hearing hynrei kane kadei ka Secret Public hearing tang jong ka Star cement bad jong ki katto katne, la kynthoh ka seng.
Ka seng ka kwah ruh ban buh jingkylli kumno ki bor Districts ka East Jaintia ki ailad ia ka Star cement ban pyllong ia katei ka Public hearing ha kum kane ka por ba dang treikam ki protocol iada COVID-19 jong ka tnad ka koit ka khiah jong ka Sorkar Jylla, ki bor Districts kila dei ban pynsangeh shwa ia katei ka Public hearing bad ban pynlong tad ynda ka sorkar jylla kan pynlait ia ki protocol jong ka jingsaphriang u COVID-19 khnang ba ki paidbah kin ioh lad ban iashim bynta lang. Haba kumne ki protocol iada COVID-19 kidei tang naka bynta u rit u ria ym ia baroh lang, bun naki briew ruh kim don jingtip ba ka Star cement kan pynlong sa kawei ka Public hearing ha une u bnai bad ki paidbah bad ka seng ki sngew lyngngoh ban iohi ha ki lad pathai khubor tad haka 29/01/2022 haka por janmiet ba ka Starcement kala dep pynlong sop sop ia katei ka Public hearing.
Ka seng khadduh ka dawa na ka sorkar MDA bad na u ma Kyrmen Shylla uba dei u Cabinet Minister jong ka Sorkar MDA ban rejected noh ia katei ka Public hearing bala dep pynlong bad ban pynlong biang sa shisien katkum ki kyndon badei khnang ba u babun balang un ioh iashim bynta lang, haba iadei bad katei jingdawa shen ka Seng kan sa phah daki jingthoh sha ka Sorkar jylla, kane kadei katkum u kyrwoh na u President bad Secretary ka Seng u Bah Michal Chyrmang bad Fullmoon Nongtdu.