Ka resol Class X mynta u snem ka long kaba kham pher bad kham phylla ha kaba ym pat ju jia koit ha ka jylla ban kiew kynsan tang hapoh 12 bnai, kata ban ianujor na u snem 2024.
Katkum ka kyrwoh ba la phah da u Executive Chairman jong ka MBOSE C.P. Marak, la ong ba ka jingpass bha ki khynnah pule mynta u snem ka dei na ka jingïarap borbah ka kot iarap ‘C.M.Impact Guide Book’ ia kaba la pyllait nyngkong da u Myntri Rangbah ka jylla Conrad K. Sangma ha ka 3 tarik Risaw 2024. Ia kane la pynskhem ruh da kiba bun ki nonghikai bad ki principal khamtam ia ki skul nongkyndong.
Kaba kham pynioh mynsiem shuh shuh ka long ba napdeng 55,473 ngut kiba la pass mynta u snem, 22,726 ngut dei ki shynrang bad 32,747 ngut ki kynthei. Kane kan sah ruh ha ka khana pateng jong ka Jylla, ba kiba wan sha khmat ruh dei ki kynthei bad kaba kham sngewtynnad ka long ba 85 ngut kiba wan sha khlieh duh (top 20) ruh ki kham bun ki kynthei.