U President ka Hynñiewtrep Integrated Territorial Organisation (HITO) sengkmie samla Donbok Dkhar haba jingkren mynta ka sngi ha ka jingïalang pynbam smai ïa ki nongkitkam ka HITO Jowai Area, ula ban jur halor ka jingdonkam ban don ki jaka pule puthi hapoh ka Ri-Lum Jaiñtia da kaba ong ‘la dei ban dawa pynkylla noh ïa ka MDC Hostel jong ka Jaiñtia Hills Autonomous District Council (JHADC) kaba don ha Riatsasim sha ka College ne ka jaka pule puthi jong ki samla’.
Na ka liang jong utei u nongialam ula ong ba kumba la ïohi mynta kane ka Hostel kala long pynban kum ka jaka ïadih ïabam bad ka jaka ïakhalai jong ki riewheh spah, u bah Dkhar ula kynthoh jur ïa kane namar ba ula lap dalade hi, ula ong ruh baroh ki Building sorkar ki bym shem la treikam bha hapoh Jaiñtia ki la dei ban pynkylla noh ïa ki sha ki jaka pule khnang ban lait na ka jingduh klas ki khun samla pule bad na ki jingmlien basniew.
Kumta u kyntu ïa kitei ki nongïalam ba thymmai ba kin pynleit jingmut ban shimkhia ïa ki mat (issue) kiba ïadei bad ka pule ka puthi namar hapoh ka Rilum Jaiñtia ki dang duba bha ki jaka pule. U la kyntu ïa ki nongïalam ba thymmai jong ka HITO Jowai Area ba ki dei ban long kiba peitngor bha ïa ka jingeh jong ki paidbah nongshong shnong ka Ri-Lum Jaiñtia, kum ki nongïalam ki donkam ban don ka jingïatylli bad ka jingtrei hok na ka bynta ka jaitbynriew.
Ula pynsngew ruh ba ka HITO ka don ïa kine ki thong ban ïakhun mynta u snem na ka bynta ki samla, kata ka long ka jingpynjlan ïa ka rta thungkam (upper Age limit), kaba ar ka dei ban ïoh noh da ka Meghalaya Cadre ban ïakhun ïa ki Exam IAS bad kiwei de ym ban kynthup lang bad ka Assam bad kala lai ka dei ban ïakhun naka bynta u Pud u sam. Kumjuh ka jingpyntreikam noh ia ka ILP. Ka seng kan ïeng bad ïaleh da u khulong bad da ka jingstad
Katba na ka liang u Assistant General Secretary sengkmie samla Lawyerson War ula ong haba trei kum ki nongïalam seng bhalang, dei ban peit nyngkong ïa ka jingeh u paidbah ym na ka bynta ka jingïoh myntoi shimet khnang ba ka jaitbynriew kan kiew shaphrang.
Ha kane ka sngi ïa ka jingïalang la pynïaid da u General Secretary ka HITO sengkmie u samla Wanbun Dkhar ha ka jingïadon lang kiwei de ki nongïalam ba hakhma eh jong ka seng bad na ka liang u President Rangbah ula pynbam smai ïa ki nongïalam ka HITO Jowai Area na ka bynta ka samoi treikam 2022-2022 kiba kynthup ïa u President: Husiaryo Thubru, Vice President: Baristar T. Dhar, General Secretary: Hisamiyoo Susngi, Asst. Secretar: Kyrshanlang Pasleiñ, Publicity: Martin Susngi, Asst, Publicity: Shanbor Thubru, Organising: N. Dhar, Asst. J. Thubru Education Secretary: A. Thubru, Asst. Chandibormi Sungoh, Sports Secretary: Hame Pale, Asst. George Secretary: Agriculture Secretary: Ram Sungoh, Asst.: P. Thubru lem bad ki 10 ngut ki dkhot member.
