U Bah Kyrmen Shylla, MLA Khliehriat, East Jaintia Hills u la ong ba ka Sorkar jylla ka la sdang mynta ia ka jingtih dewiong kaba katkum ka buit saian lane ki kor kiba katkum kane ka juk (Scientific Mining) na ka bynta ban iarap ia ka koit ka khiah jong ki briew, ban pyntikna khlem kano kano ka jingmynsaw bad khamtam ka jingkhuid ka mariang bad ka lyer kaba khuid.
Ka jylla ka la im da ki phew snem ban pyndonkam ia ka jingtih dewiong da ki briew kiba rung ia ki thliew khnai kaba la shim ruh ia ka jingim jong ki briew. Da kane ka buit, u Bah Shylla u don ia ka jingngeit ba kan ym ktah shilliang, kata ia kiba duna ka ioh ka kot bad kiba la lah ban thied da kitei ki kor. “Ym don mano mano ba kwah ban trei ia ki kam kamai ne khaïi pateng da ka rukom ka bym long be-aiñ (illegal) la ha u Dewiong ne ha kano kano ka kam, ka shu long ba kim don da kawei pat ka lad. Sngewkmen ban iathuh ba kane ka Sorkar ba mynta, ka MDA 1 bad MDA 2 ka la sdang ia kane ka rukom tih dewiong da ka buit thymmai kaba mynta bad ngi ngeit ba kane kan long ka jingmyntoi ia ki briew. Kane ka ai ia ka jingiada ia ka jingim jong ki briew, ia ka mariang bad ia ki nongbylla. Hooid kane kan ktah ia ka jingioh hynrei ha kaba kut hi ngi hap pyrkhat ia ka mariang” ong u Bah Kyrmen.
Shuh shuh u Bah Shylla u la ong ba mynta hi kane ka kam ka la sdang bad ka i shem jingeh, hynrei ha India ym don kaei kaei ka bym lah. Nalor kata u la ban biang da kaba ong ba ka jingtih dewiong be-aiñ ka lah ban myntoi shibun ia kiba im ja nangto hynrei kan ktah pat ia ka ban sa wan. “Balei ban kheiñduh ia la la jingim, balei ban kheiñduh ia la ka spah namar ha kaba kut hi, ki hap ban iatreilang bad ka sorkar.