Ka kong Santa Marry Shylla khun jong u ma Thomas Nongtdu, Ex- Nominated MDC ka JHADC na ka shnong Byndihati, East Jaintia Hills District kan dei ka kyrtong jong ka Nationalist Peoples’ Party (NPP) wat la ka Party kam pat pynbna ïa ka kyrteng jong ka.
Kumba long mynta ka kong Santa kala sdang ban pynithuh ïalade sha baroh ki shnong jong ka Sutnga-Saipung LA Constituency halor kane ka jingthmu jong ka ban ïakhun ïa ka MLA 2023 na kane ka Constituency pyrshah ïa u ma Shitlang Pale uba dang dei u MLA ba mynta.
Ka kong Santa kan hap ruh ban ïaleh pyrshah ruh ïa u ma Vincent H Pala uba dei u President jong ka Meghalaya Pradesh Congress Committee (MPCC) bad u ba dang long ruh u MP jong ka Lok Sabha, ula ba rai ban ïakhun na kane ka Constituency.
Katkum ka khubor ba la ïohlum mynta ka sngi na Byndihati, la ong ba ki paidbah ka Constituency kiba la kwah ban ïoh ïa ka nongmihkhmat da ka long kmie, ki pynpaw ba ki kwah ban kyrshan pura ïa ka kong Santa Marry Shylla ha kane ka elekshon ban wan 2023.
Ki paidbah ka Sutnga-Saipung Constituency ki ong ba kila ïoh mad ïa ki nongmihkhmat da ka rangbah ha kine ki snem kiba la leit noh bad kila ïohi ïa ki kam jong ki. Mynta pat kin ai ka jingkyrshan ïa ka kong Santa kaba dei ka longkmie ban pynjop donburom ïa ka bad ban peit ïa ki kam jong ka hapoh ki san snem ban wan.