Haka kyrwoh na u President rangbah ka JNC u bah Sambormi Lyngdoh u la ong ba hakaba iadei bad ka Save Jaiñtia Mission ia kaba ka seng ka laioh ban leit sha kiba bun ki jaka ka Ri lum Jaiñtia ban pynshai ia ka nongrim ba la seng ia kane ka mission naduh bala seng iaka haka 14 Tarik u December 2024 naka bynta ban pynbha bad pynmiat ia ka Ri Jaiñtia.
U President ka JNC u la ong ha kane ka jingiaid lynti jong ka seng ia kane ka save Jaiñtia Mission ka long kaba iaid beit shakhmat ha ki jingmut babha hynrei sngewsih pat ban ong ba don kiba sngewthuh bakla iaka bad kaba kham sngewsih shuh shuh kalong don pat kiba shim kabu ban ialam bakla ia u Paidbah. Kane ka mission kam dei ka mission kaba shahliang iakano kano ka political party ne ia kino kino ne ka mission ban pyrshah iakano kano ka party ne ki riew shimet hynrei ka dei beit ka thong ban leit pynshai sha u Paidbah na ka bynta ban dawa ia ki San tylli ki mat bala bsuh ha kane ka mission ong u President ka JNC.
Shuh shuh u la ong ba ia kane ka mission ngin sa sdang biang iaka ynda lah dep ka election bad ngim shong kli kti tad haduh baka sorkar kan pynurlong iakine ki mat.
Kum ban shu pynkynmaw ba ki san tylli ki mat jingdawa bala buh hakane ka mission ki long
- Ban pynkhlaiñ iaka JHADC
- Ban pynrung iaka ktien Jaiñtia haka State anthem bad ha ka State Launguage act.
- Ban shna noh iaka policy thymmai hakaba iadei bad ki kam thungkam thungjam ha ki cement factories.
- Ban pynbeit noh ia u pud u sam hapdeng ka Jaiñtia bad ka Assam da kaba pynshong nongrim ia ka PRE 1951 Jaiñtia hills map.
- Ban shna noh daka small scale coal mining policy, ban myntoi ia u rit u ria.