Ka Dorbar Shnong Khliehshnong Sohra hapoh ka jingialam jong u Rangbah Shnong u Dr Shembhalang Kharwanlang ha ryngkat bad ki nongpyniaid shnong ki la leit ban jurip ia ka Hospital Ayush 50 jingthiah kaba dang shu dep shna thymmai hapoh u pud u sam jong ka shnong kaba don ha Washari Khliehshnong Sohra bad la lap ba kane ka hospital ka khlem pat pynbiang ia kita ki agreement katkum ka jingiapynbeit bad ka shnong.
Haba kren sha ki lad pathai khubor na ka liang u Rangbah Shnong Khliehshnong Sohra u Dr Shembhalang Kharwanlang u la ong kane ka hospital Ayush 50 jingthiah ka dei kaba la ioh lyngba ka skhim hapoh ka jingiarap u MLA barim ha u snem 2016 bad ha u snem 2017 ka la don ka agreement kaba la ia don lang na ka DMHO ryngkat bad ka shnong ha kaba ka tnad ka koit ka khiah ka la kular lada ai ia ia ka jaka ki nongshong shnong kin ioh kam, hynrei lada kim kular ban ai kam ia ki nongshong shnong ka shnong kam ai ia ka jaka katkum ka jingthoh ha ka agreement.
Shuh shuh u la ong na ka liang ka shnong ka la leit iakynduh bad ki bor pyniaid ka tnad Ayush ban buddien halor kane ka jingioh kam ki trai shnong hynrei na ka liang ka tnad Ayush ka la pyntip ba 8 ngut na khlieh shnong ki ioh kam ha kane ka hospital Ayush, bad na ka liang ka shnong ka la ong lada 8 ngut ki trai shnong ki ioh kam ha kane ka hospital ka shnong ka pdiang, hynrei haba iadei bad ka Solid Waste Management ka jaboh ba mih na katei ka hospital kan ktah ia ki nongshnong, namar arliang jong katei ka wah ka don ka um bam umdih kiba ka nongshong shnong ki pyndonkam.
Shuh shuh u la bynrap ka shnong kam pyrshah ia ka hospital, ka shnong ka kwah bha ia ka hospital, hynrei haba iadei bad kane ka bynta ka shnong ka kyntu ia ki bor pyniaid ka tnad Ayush ba kan pynbiang ia ka solid waste Management kaba ktah ia ka mei mariang lyngba ki jaboh ba mih na kane ka hospital, namar ha ka jingleit jurip la lap ba ka Ayush hospital ka khlem bud ia ki kyndon jong ka shnong haba iadei bad ka Solid Waste Management, namar ka Dorbar shnong ka peit bha bad sumar khamtam ia ka mei mariang.
U Rangbah shnong u la pyntip ba ka shnong ka kwah ia ka list jong ki nongshong shnong kiba ioh kam ha kane ka hospital bad ka dei ban bud ryntih ia kiei ki kyndon ba ka shnong ka buh namar kane ka hospital kan sa plie noh katkum ka jinglap jong ka shnong bad ka shnong kam pynwit ynda la treikam kane ka hospital, hynrei shwa ban treikam ka dei ban bud ryntih ban pynbiang nadong shadong shwa ban plie ia kane ka hospital namar ka shnong kam kwah ba kane ka Ayush hospital kan shu leh kuman kan iaid ha la ka jong ka mon, namar ha ka agreement la long trai hi da ka shnong.
Ha ka jingjurip ia ka hospital ka shnong ka iakynduh ia ki nongtrei ka hospital ka khlem pyrshah ne beh ia ki nongtrei katei ka hospital. Ka tnad Ayush jong ka koit ka khiah ka dei ban shimkhia katno ngut ki nongshongshnong ki ioh kam bad ka tnad Ayush ka dei ban shimkhia ha ba iadei bad ka bynta jong ka Solid Waste Management.
Halor ka jingkylli lada ka tnad Ayush kam bud katkum ki kyndon ba la ia sign bad ka shong ha ka agreement halor katei ka hospital na ka liang ka shnong ha ka agreement ka la thoh shai ba kan leit sha District Council Court bad ki bor pyniaid ka tnad Ayush kim dei ban kylla jutang ki dei ban pynneh katkum ka jingthoh ba la thoh ha ka agreement bad ka shnong la pynkut u Rangbah Shnong Khliehshnong Sohra u Dr Shembha Kharwanlang.
