Ka Skill Mela ba ar sngi ba la pynlong da ka State Skills Development Society (MSSDS) hapoh ka jingpeit ka tnad Labour ha Kiang Nangbah Government College Auditorium, Jowai ha kaba la plie pyrda ïa ka da MLA Jowai Constituency ba dei ruh u Chairman ka MCCL u ma Wailadmiki Shylla.
Ha kane ka sngi la ïadonlang ruh u Executive Director, MSSDS u Shivansh Awasthi, IAS, ki ADC West Jaiñtia Hills District bad i Principal ka Kiang Nangbah Govt. College.
Ha ai jingkren ha kane ka sngi u ma Wailad ula ong ba ka Skill Development ka don ka bynta ban btin lynti ïa ki samla ha ki rukom trei rukom ktah bapher bapher ba kin lah ban ïeng hala ki jong ki kjat.
U Executive Director, ula ong ba ïa ka Skil Mela la pynlong hapoh ka Skill Meghalaya Programme kaba la dep ban plie paidbah da u Chief Minister ka jylla u Conrad K Sangma ha u bnai March mynta ka snem. Kane ka dei ka skhim kaba kyrpang na ka bynta ki samla jong ka jylla ban don bynta ha ka ban kyntiew ïa ka ïoh ka kot jong ka jylla.
U la ong ba ha kane ka prokram kan sa lah ban ai training haduh 1.2 lak ngut ki samla ha kine ki san snem ban wan. Tang hapoh kine ki 6 bnai la lah ban ai training haduh 34 tylli ki Local Traning Provider kiba la thung ruh ban pynïoh jinghikai sha ki 2595 ngut ki samla ha ki 14 tylli ki sector, kiba la ai jinghikai shaphang ki 35 jait ki kam ha ki 44 tylli ki traning Centre ha kylleng ki 12 tylli ki District ka jylla.
Hapoh kine ki ar sngi yn pynleit jingmut ha ki lai tylli ki phang ba kongsan, kum ka jingpynïajan ïa ki nongwad kam bad ki nongaikam lyngba ka ka Job Fair, ban ai lad ïa ki nongsengkam lajong ban pyni sha ka pyrthei ïa ki jingshna tynrai jong ki ha ki Haat Bazaar bad ha ka juh ka por ruh ban pynsngewthuh ïa ki samla shaphang bun ki lad ki lynti ba ki lah ban ïoh da kaba kin pynrung kyrteng ïalade ha kum kine ki prokram.
