JOWAI: Ka ophis jong ka District School Education Officer, West Jaintia Hills, ka la rakhe ïa ka sngi ki nonghikai kaba 64th ne ka 64th Teachers’ Day ha ka District Library Auditorium, Jowai, kaba la buh halor ka phang, “A teacher affects eternity, they can never tell where their influence stops.”
U MLA jong ka Jowai bad Chairman MUDA, u ma Wailadmiki Shylla, u la long kum u Kongsan ha kane ka sngi ki nonghikai. Ha ka jingkren jong u, u la pynpaw ba ki nonghikai ki dei ki nongtei ïa ka ri, ki nonglam lynti, kiba ai jinghikai ym tang ha ka pule hynrei ha ka imlang sahlang ruh. U la batai ruh ïa ki jingpyrshang jong ka Sorkar ban kyntiew ïa ka pule puthi da ka jingplie ia ki skul bad college thymmai, kynthup ruh ki jaka pule B.Ed.
Hadien kata, u ma Wailad u la sam ïa ki mementoes sha ki nonghikai ba la shah jied haka District Awardees, kiba kynthup, ia ka kong Wompher Laloo, Headmistress ka Seinraij , Secondary School, Jowai, kong Lalnunsiami Shylla, Assistant Teacher ka Jingshai Mihngi Adventist Secondary School, Jowai, kong Sumarlang Pakma, Head Teacher ka PM Shri Tpep Pale Government Lower Primary School, Jowai, kong Emidaka Lyngdoh, Guide Captain ka Jowai Open Unit Guide Company bad bah Martin Pohplet, Scout Master ka Amlarem Secondary School Scout Troop, kum ka dak jong ka jingithuh ïa ka jingtrei shitom jong ki.
Ka kong Vevotolu Kezo, IAS (SDO Sadar), ka la pynpaw ba ka jingïaid lynti jong ki nonghikai kaba long ka kam kaba khraw ha ka imlang sahlang ha kaba iadei bad ka pule puthi. Ka la kyntu ruh ïa ki khynnah skul ba ki dei burom ïa la ki nonghikai kiba shim ia kam kaba khraw ha ka liang ka jingnang jingstad bad ka burom ka akor.
Ha kane ka jingïalang la wanrah ruh da ki jingïalehkai bad rwai na ki khynnah skul na kylleng, kum ka jingïarap ban pynshongkun ïa ka sngi ki nonghikai.
Kong A. Kharpuri ka la pdiang sngewbha ïa ki ba wan, katba kong C. Lyngdoh ka la ai ka jingkitbok.
KHLIEHRIAT: Kumba long sha wei, ka East Jaintia Hills District ka la rakhe ïa ka sngi nonghikai kaba 64 ha Khliehriat Higher Secondary School Auditorium. Kane ka jingïalang la pynïaid da ka District School Education Officer (DSEO), ha kaba ka Rymbai-Khliehriat MDC, kong Violet Lyngdoh ka la long ka kongsan.
Ha ka jingkren jong ka kong Lyngdoh ka la pynpaw ïa ka bynta kaba khraw jong ki nonghikai ha ka imlang sahlang bad ka la ai khublei kyrpang ïa baroh kiba la ioh ïa ka khusnam na ka bynta ka jingtrei shitom jong ki. Ka la kyntu ruh ïa ki nonghikai ba kin long kiba jemnud bad ba kin ai jingshai ïa ka jingim jong kiwei pat.
U Additional Deputy Commissioner, u S R Marak, u la pynpaw ka jingsngewnguh ïa ka jingïarap jingtreishitom ki nonghikai ha jingsam iaka jingnang jingstad sha ki khynnah pule na ka bynta ka lawei ka jong ki.
Ha kane ka sngi la sam ruh ia ka khusnam District Awards 2025 sha ki nonghikai ha ka kyrdan Secondary bad Primary bad ruh ïa ka District Best Guide Captain Award 2025.
Ka Assistant Teacher jong ka Khliehriat Higher Secondary School, kong Laura Suja, B.A, B.Ed, ka la ioh ïa ka Secondary Level Award. U Headmaster jong ka Saipung Government U.P. School, Saipung, u Lairemzoma Thianglai, MA, B.Ed, D.El.Ed, u la ioh ïa ka Upper Primary Level Award. U Head Teacher jong ka Sohkymphor Nein Government L.P. School, Sohkymphor, u Wiles Singh Langstang, PU (Science), u la ioh ïa ka Lower Primary Level Award. Katba ka District Best Guide Captain 2025 pat ka la leit sha ka Memorial Nongtdu na Khliehriat Presbyterian Higher Secondary School, Khliehriat.
