Kumba ju long shisien shisnem ka sngi u Trai sla Tlai, ki Paidriewngeit Katholik ha shikhrum ka bneng shityllup ka pyrthei, ki pynlong ia ka sngi sla Tlai kum ka jingkynmaw ia ka jingrung u Jisu ha Nongbah Jerusalem mynta arhajar snem mynshwa. Kumta ruh ki paidriewngeit ka Kynhun Balang Katholik, ki rakhe shongshit da ka jingriewblei da kaba pynlong ia ka Proseshon kaba lyngkot na Madan ka Iingmane bathymmai (Diocese Cathedral sha Iingmane rim, St.Theresa’s Shrine) Marianhill Higher Secondary School, Jowai.
Ha ka por 10:00 baje por step, la pynlong ia ka jingkñia Mas Iukharist bakhuid ha mynshem Marianhill, kaba la kñia da u Sohblei (Fr) Augustine Lamin bad ka jngpule na ka jyngthoh bakhuid (Baible) shaphang ka jingshah lehbeiñ, shah shoh, shah sympat bad ka jingshah pyniap sdien phasi u Jisu halor ka Diengphna.
U Sohblei (Fr) Augustine Lamin ha ka sneng ka kraw (Homily speech) ha kane ka sngi, u pynkynmaw ia ki Paid riewngeit ba ka sngi u Trai sla Tlai ka dei ka jingsdang ia ka Taiew bakhuid, ka por ban ngam jylliew ia ka jingmaia bad ka jingieid u Jisu Khrist ha ka lynti sha Lum Kalbari, uba shah lehbeiñ ha ki briew lajong (Jew) na ka bynta ban pynim ia ki khun bynriew. Ban pynskhem shuh shuh ia kane ka jingong, u Sohblei Augustine u la shim na ka Kitap ka jingthoh bakhuid kat kum u Issaiah, uba la thoh kumba 700 snem shwa ka jingwan longbriew jong u Jisu sha kane ka pyrthei ha kaba u la thoh thik kumno u Jisu lane u Messaiah un shah pynshitom bad shah banbeiñ ha ki briew la jong (Jew) na ka bynta ban pynim ia ka pyrthei.
Nangta u Sohblei Augustine, u ban shuh shuh da kaba ong na ka bynta ban pynim ia ka pyrthei bad ia ngi baroh, u Jisu u la shah shitom da ka mon ba laitluid bad u Kpa bneng (U Blei Nongbuh Nongthaw) Um shym la iehnoh ia u. Kane ka pyni ha ki bangeit ha u wat hapdeng ki jingeh kiba wan lynshop ha ka jingim jong ki briew kiba katno katno ruh, hynrei ym dei ban duh jingkyrmen bad u Blei ha ka jingieid jong u, un sa iarap naba u Blei u long ka jigkhlaiñ ha ka jingtlot jong ki briew, ban shuh shuh u Sohblei Augustine.
U Sohblei Augustine, u pynkut ia ka jingkren bad ka sneng ka kraw jong u da kaba ong, ba ka sngi u Trai Sla Tlai ka khot ka wer ia baroh ki paid Khristan ban pynthymmai (recommit) ialade ha u Jisu bad ban iaid bad u ym tang ha ka por jingsngewbha, ka por suk por saiñ, hynrei ban iaid ruh ha ka por jingtynjuh bad ki jingeh ha ka jingngeit Khristan. To ai lyngba kane ka sngi U Trai sla Tlai bd ka taiew bakhuid kan pynngam jylliew ia ka jingngeit sha ka jingkmen Paskha lyngba ka jingshah pynshitom, ka jngshah pyniap bad ka jingmihpat u Trai Jisu Khrist na ka jngiap.
