Ka Sohmynting, kawei na ki shnong ba la rim tam ha West Jaiñtia Hills, mynta ka sngi ka la sakhi ïa ka tamasa kaba heh kaba la rakhe ïa ka riti dustur ba riewspah jong ka bad ïa u jingthung ba kyrpang uba la kyrshan ïa ka jingim jong ki briew bad ka imlang sahlang. U Flemingia vestica— uba la tip ha kane ka thaiñ kum u Sohphlang ha ka ktien Khasi bad u Saphlang ha ka ktien Pnar, u dei u soh uba mih katkum ka aiom bad u jingbam uba ki briew ki bang bha, kumjuh ruh uwei na ki mar rep ba kongsan tam jong ka shnong. La thung ia u ha ka por tlang bad ki ot naduh u bnai Risaw haduh u bnai Rymphang man la u snem.
U Kongsan ha kane ka sngi u M. B. Rymbai, MDC uba mihkhmat ia ka thain u la ai khublei ia ka Dorbar Shnong bad ka Earth Tree Emviro Pvt Ltd kaba la lah ban pynlong ia kane ka tamasa kaba kongsan. U la pynpaw ia ka jingsngewkhia halor ka jinghiar jong ki nongrep kiba trei ia ka rep Sohphlang bad kyrmen ba kane ka tamasa kan pynkhie biang Ϊa ka mynsiem jong ki nongshong shnong bad kan pynshlur ruh Ϊa ki ban pynkiew ia ka jingmih jong une u marbam.
Ka nongrep Sohphlang kaba la slem bha ka Kong Romika Pyrtuh, kaba la kamai jakpoh na une u marbam la palat 30 snem, ka la ban jur ba u Sohphlang um dei tang u mar rep hynrei u dei u bynta ba kongsan jong ka kolshor jong ki. Ka la batai ruh shaphang ka rukom rep Ϊa une u jingthung ka kynthup naduh ka jingjied Ϊa ka jaka kaba biang, haduh ka jingot bad jingpynkhuid bad kiwei pat ki bynta ba donkam ia ka jingtip bad rukom sumar. Ka la bynrap ba nalor ba u dei u jingbam ba la ieid bha da ki paidbah, la ngeit ruh ba u Sohphlang u don ïa ki jinglong dawai.
U Dr. E.S. U Langshiang, uba la pule bniah bha ïa ki jingthung bad ki khniang ha ka shnong, u la ïaroh ïa ka rukom im jong ka imlang sahlang kaba la slem bha ban ïada ïa ki khlaw bad ki khlaw ba kyntang. Ka Sohmynting ka don katto katne ki khlaw paidbah, ar tylli ki khlaw kur, bad kawei ka khlaw kyntang, baroh ki ïarap ïa ka jinglong jyrngam jong ka shnong.
Haba ai jingkren ba kongsan, u Dr. H.H. Mohrmen u la pynpaw ïa ka jinglah kaba khlaiñ jong ka shnong ban khring ïa ki nongwan jngohkai pyrthei. U la pynpaw ka jingkyrmen ba ka Earth Tree ryngkat ka jingiatreilang bad ka Dorbar shnong bad ka tnad Tourism kan iarap ban kyntiew ia ka Sohmynting kum ka jaka jngohkai pyrthei. U Dr. Mohrmen u la ban jur ruh ba ki nongrep ha katei ka shnong ki ju rep ïa ki jhur da kaba pyndonkam ïa ki rukom rep tynrai kiba long (organic by default), hynrei, kaba sngewsih ka long ba kim ïoh ïa ka dor kaba ki dei hok ban ïoh ha ïew ha hat.
U ma P. Kynjiñ u Daloi ka Elaka Jowai u la pynkynmaw ïa ki paidbah ba ki jhur ba la thung ha Sohmynting ki dei napdeng kiba la wad bha ha ka ïew Iawmusiang namar ba ki nongthied ki tip ba ki dei kiba ym shym pyndonkam dawai. Ka kong D.S. Shylla ka District Tourism officer hapoh ka District kala Ϊathuh ba ka sorkar ka Ϊaleh ban kyntiew Ϊaka kam jngohkai pyrthei kumta ka kyntu Ϊa ki samla ban shim Ϊa kane ka kabu kaba ka sorkar ka ai mynta. Kiwei kiba la ai jingkren ha kane ka sngi ki kynthup ïa u ma J. Pyrtuh, u Daloi ka Elaka Amwi Sohmynting, bad u ma M.L. Pyrtuh, Assistant Waheh Chnong ka shnong Sohmynting. Ha kane ka tamasa kynthup ruh ia ka jingshad kolshor bad ka jingpyni ia ki sohphlang bad ki jhur.
