U Myntri Rangbah jong ka sorkar jylla u Conrad K. Sangma haba kren mynta ka sngi ha ka jingialang kaba la long ha Rongjeng, East Garo Hills ula pynshai sha ki paid nongrep ba ka song pisa kaba la pynioh mar T.5000/- (San Hajar) tyngka sha ki nongrep lyngba ki kynhun nongrep kam dei satia ka ram kaba kin hap siew pat kumba la don kiba pynsngewthuh bakla, hynrei ka dei ka jingiarap kaba la mang kyrpang da ka sorkar jylla na ka bynta ki nongrep ka jylla.
Ia kane ka lad jingiarap la pyntrei lyngba ka prokram FOCUS kaba dei ka prokram kaba khmih ia ka jingkyntiew ia ki nongrep. Namar hadien ba jia ka khlam Covid-19 kala don ka jingeh kaba khraw kaba ki nongrep ki ia kynduh, kumta na ka liang ka sorkar kala mang pisa T.220 klur tyngka na ka bynta ki 4.5 lak ngut ki nongrep hapoh ka jylla ban kyrshan jingiarap ia ki la ong shuh shuh u Myntri Rangbah.
U MR ula ong ba nalor ka jingkyrshan pisa jong ka sorkar kaba la kot da ki Hajar klur ia ki nongrep ha ki liang bapher bapher bad mynta lyngba ka prokram FOCUS kaba la thaw dang shisnem mynta bun ki nongrep ha ki liang bapher bapher kila lah ban ieng biang ban sdang ia ki kam jong ki.
Kumba long ha kine ki sngi u MR ula shimkhia dalade na ka bynta ban leit sha kylleng ki kyndong ki kynshrot jong ka jylla na ka bynta ba pynsngewthuh ia ki nongrep ia ka jingdonkam ban thaw ia ki kynhun nongrep bad ha kajuh ka por ula sam ruh ia ki jingiarap sha ki kynhun nongrep kiba la ithuh da ka sorkar.
