Kum ka dak ban pynsngew sha ka sorkar pdeng bad ka sorkar jylla ban pyntreikam ia ki aiñ kiba khlaiñ halor jingwan rung laitlan ki mynder ri.
Ka North East Students Organization (NESO) ha ka jingialang ba la long ha ka 6 tarik ka la rai ban pynlong da ka jingshong kyllaiñ myngngor ha man ki nongbah shatei lam mihngi kata ha Guwahati, Itanagar, Shillong, Aizawl, Kohima, Imphal , bad Agartala ha ka 18 tarik Nailar 2025 ban pynsngew ia ki sorkar jylla bad sorkar pdeng ban tehlakam ia ka jingrung kyrthep ki poi ei ha kitei ki thaiñ da kaba shna ia ki aiñ ban pyrkhing ia ka jingrung laitlan ki poi ei.
Ka KSU mynta ka sngi ka 18 tarik Nailar ka la pynlong ia ka jingshong kyllaiñ mungor ha nongbah Shillong ha Khyndailad.
Ha kane ka sngi kiba wan iasnohkti lang bad ka KSU ki kynthup ia u Chairman ka North East Students Organization (NESO), Federation of Khasi Jaintia & Garo People (FKJGP ), Hynniewtep National Youth Front HNYF bad ka Hynniewtep Intergrated Territorial Organization (HITO).
Haba ai jingkren ha kane ka sngi na ka liang u Chairman ka NESO u Bah Samuel Jyrwa u la bynrap ” Na ka liang ka NESO bad ki kynhun sengbhalang bapher bapher ngi hap ban pynbor ia ka sorkar jylla kumjuh ia ka sorkar pdeng kaba la shong kli kti , haba iadei bad ka jingrung kyrthep ki briew ba nabar.
Ka sorkar jylla kam pat don ia kita ki aiñ ha jylla Meghalaya ki ban iada ia kita ki rit paid ha ka jylla.
Shuh shuh u la ong naduh mynshwa haduh mynta kim pat don kita ki aiñ kiba khlaiñ ban iada ia ka jingwan rung kyrthep ki bar jylla.
Ka thaiñ North East ka la kylla shisha da ka jingdon ki jaitbynriew bapher bapher khamtam sha thaiñ shatei lam mihngi, ki trai ri trai muluk ha ki ba bun ki jaka ki la kylla rit paid.
Nalor kata u la ong ka ka NESO bad ki kynhun sengbhalang ki kwah ba ka sorkar India ka dei ban pyni da ki kam hapoh madan kumno ba kan iada ia ki trai ri trai muluk jong ka thaiñ shatei lam mihngi baroh kawei ban pynher krad ia ki ba nabar kiba wan rungtuh sha ka jylla.
