Katba ka Jylla ka dang mad ia bun ki jingshah pynrem lyngba ki jingjia ha kine ki khyndiat sngi bad sakhi ruh bun ki kam sniew namar ka jingioh kabu ki briew nabar Jylla ban rung katba mon hapoh u pud u sam jong kane ka Jylla, u Bah Metbah Lyngdoh uba dei u Nongialam ba Rangbah ka Seng United Democratic Party (UDP) u la ong ba ka ILP ka long kaba donkam bha bad ha kajuh ka por u la pyntikna ba ka Jylla ryngkat bad baroh ki Nongialam ka la long ba la pynkhreh ban pdiang ia ka ILP hynrei ka rai ka long na ka Sorkar Pdeng.
U Bah Metbah u la iathuh ba baroh 60 ngut ki MLA kynthup ia u Myntri Rangbah Conrad K. Sangma ki angnud ba ka Sorkar pdeng kan pdiang noh ia ka jingtyrwa ka Sorkar Jylla namar katkum ki jingiaid lynti kiba ka Jylla ka mad lyngba kine ki snem, la i donkam noh ban ioh ia katei ka jingdawa. “U Myntri Rangbah bad baroh ki Myntri ki don ia ka juh ka thong naduh ki por kiba mynshwa haduh mynta. Ha kaba iadei bad ka MRSSA, ngam iohi ba don kano kano ka jingbakla ngi lah ban ioh ia kajuh ban peit ba kino kino ki rukom treikam namar kane kadei ka jingsngewkhia na ka bynta ka jingioh rung pathar ki briew ha kane ka Jylla” ong u Bah Lyngdoh.
U Bah Metbah u la ong ruh ba ka Sorkar Jylla ka dei ban iai pynbor ia ka Sorkar India na ka bynta ban pyntreikam noh ia ka ILP ha ka Jylla.
U Bah Lyngdoh u don ka jingsngew ba ka Sorkar Pdeng ka shem jingeh bad pynslem ban rai na ka bynta ban pyntreikam ia ka ILP ha ka Jylla ka long lehse ba don kaei kaei ka jingwit lane ioh ka ILP kan ktah haei re haei.
