U Rakkam Sangma, Myntri ba khmih ia ka tnad Pule Puthi ha ka jylla, hynne ka sngi u la pynbna paidbah biang sa shisien hadien ba la ioh jingtip ba don katto katne ki nonghikai skul sorkar kiba leh buit-tuh, kata da kaba buh bujli da kiwei ki nonghikai ban shim ia ka bynta jong ki ban hikai khlem da don ialade ha Kato ka skul bad ban siew ia kito ki nonghikai ba ki buh kumba shipawa na ka tulop ba ki ioh.
U Myntri u la ong ba ki Head jong ki skul ki dei ban ai jingtip bad ai jingkheiñ mar mar sha ka tnad pule lada lap ia kino kino ki nonghikai kiba leh buit-tuh (proxy).
“Nga iohsngew ba don katto katne ki skul ba leh ia kine ki kam kiba ym lah ban pdiang bad ki bym dei katkum ka nongrim jong ka Sorkar bad kiba long pyrshah ruh ia ka jingkwah u Paidbah. Lada ngin ioh ka jingtip ba tikna shaphang kane, ka Sorkar kan ai da ka jingpynshitom kaba heh. Ngi pynshlur ba phin thep ia kine ki kam bad lada phi kwah ban long nonghikai, long shisha kum u Nonghikai” ong u Sangma.
“Hooid, ngi la iohsngew ruh ba don ki nonghikai kiba la thung shuh shuh sa kiwei ki Nonghikai nalor jong ki na ka jingduna ki nonghikai bad ba khia ka kam, kata na ka jinglut jong ki hi, nga lah ban ong ba na ka bynta jong ki ym don daw ei ei hynrei pynban ngi iaroh ia kiba kum kita” la ong biang u Sangma.
Nalor kata u la pynshai ruh ba lada don ki nonghikai kiba donkam kyrkieh lane ha ka shitom ka pang, ki lah ban pyntip sha u/ka Head jong ka skul na ka bynta ban ioh ia ka shuti kaba shipor.