U Block Development Officer (BDO) jong ka Thadlaskein Block u Dr Heimonmi Niang ula pynshai shaphang ka Special Job Card kaba long ka hok jong ki nongshong shnong hapoh ka ri kiba don ka jingduna ha ki dkhot met jong ki.
Ha ka jingïalang kaba lyngkot kaba la long ha katei ka ophis kaba la ïadonlang ruh ki briew kiba don ka jingduna ha ki dkhot met, ula ong ba baroh ki nongshong shnong kiba don ka jingduna ha ki dkhot met, ki don ka hok ban ïoh ïa ka job card kaba kyrpang (special job card). Ka longïng kaba don ïa ki dkhot kiba kum kine nalor ka job card kaba kawei pa kawei ka longïing ka dei ban ïoh, kito kiba don ka jingduna ha ki dkhot met, ki dei ban ioh ia ka job card kaba kyrpang.
U Dr. Niang ula ong ba kane ka dei ka hok jong ki bad u kyntu ïa ki Secretary VEC kumjuh ruh ki nongtrei jong ka Block ba kim dei ban pynduh ïa ka hok kaba ki dei ban ïoh. U Dr. Niang ula kyrpad ruh ïa kine ki paralok kiba don ka jingduna ha ka dkhot met kiba shong ba sah hapoh ka Thadlaseiñ Block ba kin kynjoh ktien ïa u lada ki don kano kano ka jingdonkam.
Ka kong Ripnar Shylla kaba long ka APO jong ka Thadalskeiñ Block kala pynshai ïa kine ki nongshong shnong kiba ba don jingduna ha ki dkhot met, ba ki dei ban ïakynduh ïa ki Secretary VEC jong ki bad ban pynbiang ïa ki kot ki sla kum ka EPIC, ka Adhar, ka dur shiteng bad kiwei kwei khnang ba yn lah ban pynïoh ïa ka job card kaba ki dei ban ïoh.
Ka kong Ripnar kala ong ruh ba ha kine ki sngi kiba la dep, naka liang jong ka ophis jong u BDO Thadlaskeiñ kila lah ban aiti ïa ki job card sha ki katto katne ki nongshong shnong jong ka Block kiba don ka jingduna ha ka bor ïohi.
U Dr. H.H. Mohrmen uba long u Secretary jong ka SURE ka seng treimon sngewbha ula pynpaw ka jingsngewnguh ïa u BDO bad ka APO na ka bynta ka jingtrei shitom jong ki. La ïoh ruh ïa ka jingkren jong u Krishna Phawa na Mihmyntdu bad ka Heiioobitmi Tre Dhar na Wahiajer kiba don ka jingduna ha ka bor ïohi.
