[Da u Wandima-U- Sumer bad Endearing Star Langstang : FYUP- 5th Semester Sociology, Synod College, Shillong]
Ka Society for Urban and Rural Empowerment (SURE), ka dei ka seng trei mon sngewbha kaba shimkhia bha na ka bynta ka roi ka par bad ka jingkylla ha ka imlang sahlang ha ka thaiñ Jaintia Hills. Ka dei kaba la sdang ha u snem 1995 kum ka jingthmu ba la ialam da ki samla ba la tip kum ka Liberal Youth Cultural and Adventure Association (LYCAA) jong ka Balang Unitarian, Jowai, bad mynta ka la kylla long ka seng kaba pyntreikam ia ki projek bapher bapher ha kylleng ki jaka sor bad nongkyndong.
Ka LYCAA na kaba sdang ka la ïoh jingkyrshan na ka bor synshar District bad hapoh ka skhim jong u Myntri Rangbah ka Jylla kaba peit ia ka bha ka miat jong ki samla. Wat la ka seng ka la sangeh katto katne snem, hynrei la pynim biang ia ka ha u snem 2015 da u Rev. H.H. Mohrmen bad ka kynhun ki samla balang. Naduh kata ka por, la pynkylla noh ia kyrteng jong ka LYCAA sha ka Society for Urban and Rural Empowerment (SURE) bad mynta ka kynti ka la sakhi ia ka jingroi kaba khraw.
Ka SURE ka don ia ka ophis treikam ha phylla ka ïing Balang Unitarian, Jowai, ka don ia ki nongtrei palat 80 ngut. Ka pyniaid ia ki katto katne ki jaka ba kongsan ba kynthup ia ka Drop-in Centre, ka Halfway Home kaba peit ia ki briew kiba don jingduna ha ka bor pyrkhat pyrdain, ka ophis jong ka Link Workers Scheme (LWS) ha Khliehriat, bad ar tylli ki jaka ai jinghikai ha Amlarem bad Jowai.
Ka seng ha kaba sdang ka la sdang da ki jingpyrshang kiba rit kum ka jinghikai shaphang kumno ban kynshew ia ka pisa tyngka kaba la kyrshan da ka NABARD, hynrei mynta ka la pyniaid ia san tylli ki projek kiba heh bad ki prokram ai jingiarap kiba bun jait.
Ka thong jong ka SURE ka long ban pynkupbor ia ki shnong ki thaw lyngba ka jinghikai, ka koit ka khiah, ka jingpynroi ia ki sap, bad ki rukom treikam kiba lah ban pynneh pynsah. Ka ialeh ban kyntiew ia ka jingseng kam seng jam lajong, ka jinglah ban ioh ia ka jingsumar, ka jingpynkupbor ia ki samla, bad ka jingpynroi ia ka mariang. Ka seng ka pyrkhat ia ka imlang sahlang kaba iadei dur ha kaba ki riew shimet ki lah ban ioh ia ki lad jingiarap bad jingkyrshan kiba donkam ban poi sha ka jinglah kaba pura.
Ha ka jingiatreilang bad ka North East Slow Food and Agrobiodiversity Society (NESFAS) ka SURE kala pyntreikam ia ki ar tylli ki project ba kongsan kiba kynthup ia ka; “No One Shall Be Left Behind” lane “Ym don mano mano ba shah iehnoh shadien”, kaba la kyrshan da ka Rural Electricity Corporation (REC), Meghalya, bad ka Agroecology Learning Circles, kaba dei ka projek kaba hikai ban pynneh pynsah ia ka kam rep kam riang kaba la kyrshan da ka Meghalaya Basin Management Agency (MBMA).
Ka SURE ka dei ruh ka nongpynbiang jinghikai ba la ithuh da ka Meghalaya State Skill Development Society (MSSDS), bad ka la don ka bynta kaba kongsan ha ki prokram sorkar. Ha ka por jong ka jingwan lynshop jong ka khlam COVID-19, ka seng ka la pynlong ïa ki jingpynsngewthuh paidbah bad bteng ïa ki jingshakri ai jingiarap.
Da ka jingthmu kaba kynthup lang, ka SURE ka la shim ia ki sienjam kiba kongsan ban kyrshan ia ki briew kiba don jingduna ha ki dkhot met bad kiba duna ka jingiohi, ban pynthikna ba kin ioh ia ka jinghikai, ki hok, bad ki lad iohkam. Ka jingpyrshang jong ka, ka iaid ruh sha ka jingiarap ia ki shnong ki thaw ban ioh ia ki jingmyntoi bad ka jingbha jingmiat lyngba ka jingiatreilang bad ki tnad sorkar.
Katba ka nang kiew, ka SURE ka dang long ka nuksa kaba bha halor ki jingpyrshang kiba pynshong nongrim ha ka jingngeit, kiba la ialam da ka imlang sahlang ki lah ban pynkylla ia ki jingim bad kyntiew ia ki thaiñ baroh kawei lyngba ka jingaiti, ka jingsngewrit, bad ka jingroi kaba neh.
