Ka lieng haw-haw jong ka ri India ba la ai kyrteng Chandrayaan-3 mynta ka dang don ha ka jingiaid tawiar sawdong (Orbit) ia u Bnai bad katkum ka jingbuh thong ba kane ka lieng haw-haw kan ioh ban iuh kjat ha u Bnai ha kane ka 23 tarik mynta u bnai.
Ka ri India lyngba ka Indian Space Research Organisation (ISRO) kala lah ban pynher ia ka lieng haw-haw ba la ai kyrteng Chandrayaan-3 naduh ka 14 tarik u July mynta ka snem na ka bynta ban leit iuh kjat sha ki bynta ba shathie (South Pole) jong u Bnai.
Katkum ka jingiathuh jong u khliehduh ka ISRO u S. Somnath ula ong ba kane ka lieng haw-haw la buh thong ba kan hiar khyndew ha u Bnai ha ka 23 tarik mynta u bnai Nailar 2023. Lada kane ka jingthmu kan long kaba seisoh ka ri India kan dei ka ri kaba nyngkong eh ban iuh kjat ia ki bynta ba shathie jong u Bnai.