Hadien ka jinglap ia ka met u heprit Kyrshanbor Kharmudai na Mawpat, na ka liang ka khun Hynniewtrep National Awakening Movement (KHNAM ) ka pynrem jur halor kane ka jingjia.
Haba iakren bad ki lad pathai khubor u Working President ka KHNAM u Bah Thomas Passah u la ong hadien ka jinglap ia ka met u heprit Kyrshanbor Kharmudai, na ka liang ka KHNAM ka pynrem jur halor kane ka jingjia bad kaba sngewsih eh ka long ba u Myntri Sorkar ba bat ia ka tnad kam pohïing u Bah Prestone Tynsong u ong ba ki kmie ki kpa ki dei ban kitkhia ia la ki jong ki khun.
Na ka liang u Working President u la ong mano hi ki kmie ki kpa ki bym shimkhia ia la ki jong ki khun bad don seh ki kmie ki kpa ki bym khuslai ia la ki jong ki khun? baroh ki kmie ki kpa ki shimkhia ia la ki jong ki khun.
Nalor kata u la ong ia ka sorkar ba kam don jingmyntoi ia ka Smart City lada khlem ioh ia ka Safe City.
U la bynrap “lada peit ia ka shilynter ka surok naduh Civil shaduh Laitumkhrah kam don streetlight mano ban pyndait ia ki street light mano ban pyntikna ba kin shai ki lynti ki synkieng, namar ha ka jingdum ki bun ki briew kiba shim kabu bad lah bun bah ki paidbah kiba ujor bad ka dei ka kamram jong ka sorkar ban pyntikna ba ki paidbah nongshong shnong kin long shngaiñ”.
Ka KHNAM ka kyntu ia ki bor pulit ba kin shimkhia bad ban wad ia kine ki riewthrang snam kiba shim ia ka jingim jong u heprit Kyrshanbor Kharmudai bad kin ioh ka jingpynsaja kaba biang bha khnang ba kan long ka jingsneng ia kiwei pat kiba thmu ban pyrshang bad ban pynmynsaw ia ka Jaitbynriew.
