U Bah Paul Lyngdoh uba dei ruh u Myntri ba khmih ia ka tnad “Arts and Culture’ bad ‘Tourism Department’ u la pynshai ba ka jingthmu jong ki katto katne ki kynhun niam ban pynkylla jaka leh niam ne mane blei ha ka krem Mawjymbuiñ kaba don ha Mawsynram kan ktah shibun ia ki nongwanjngohkai pyrthei bad ruh ia ki nongshong shnong jong ka thaiñ Mawsynram.
U Bah Paul u la ong ruh ba katei ka jaka kadei kaba khring ia shibun ki briew namar ka jinglong kyrpang jong ka bad lada ailad ban pynkylla jaka lehniam jingno ne jongno kan ktah ia kiwei pat kiba thmu ban wankai ha katei ka jaka. “Ka India kum ka secular state kam lah ban kyrshan ia kum kata ka jingaijingmut” ong u Myntri.
U la iaroh bad kyrshan ruh ba ka jingrai jong ka dorbar shnong Mawsynram kadei kaba don jingmut bad kaba bha.