Ka jingsniew palt jong u surok bah National Highway-6 ha ki bynta ka thain Naruh jong ka East Jaintia Hills District, ka la nangjur nangjur shuh shuh katba nangmih ki sngi ki por, ha kaba kane ka jingsniew jong une u surok kala wanrah ka jingeh kaba khraw ia ki nongleit nongwan jong katei ka thaiñ.
Une u surok ym tang u buh jingeh ia ki bun tylli ki shnong jong katei ka thain hynrei udei ruh u surok uba pyniasoh ia kiwei de ki jylla bapher bapher. Ki nongleit nongwan lyngba une u surok ki la iathuh ba kumba long haba ki mih na ki shnong jong ki ban leit sha sor kum sha Khliehriat, Jowai Shillong bad kiwei de ka la shim por ia ki da ki bun bun kynta teng teng wat da ki sngi ruh, kane ka wanrah ka jingeh ba khraw khamtam ha ka pang ka shitom.