Mynta ka sngi ka 11 tarik Nailar 2025, ka Sorkar Jylla ka la sdang shaid shaid ban pynkhreh na ka bynta ban rakhe ia ka sngi Laitluid (Independence Day) kaba 79 ha ka 15 tarik Nailar ha kylleng ka jylla da kaba sdang ban shna ia ki Khilon bad ki jingpynitynnad kynthup ha 9-Lad. Katba ka jingpynkhreh ka la sdang ban pynphuh ia ka 9-Lad, ki nongdie madan kiba khlem pat ioh ia ki Laisen (Certificate of Vendor – COV) haduh mynta ka sngi, ki la sdang ia ka jingiakhih kaba tyngeh da kaba shong shah thngan ha 9-Lad ban pynpaw ia ka jingpyrshah halor ka jingleh shiliang ka Shillong Municipal Board (SMB) ban ai Laisen.
Haba sngap ia ka sur jong ki nongdie madan, ki la iathuh ba ka jingiakhih da ka jingshah thngan ka dei da ka jingbym banse namar ba donkam khaw ha ïing, nalor kata katkum ka jingbthah jong ka SMB ki la pyndep ia ka kamram ban leit pynrung kyrteng ialade (register) na ka bynta ban ioh ia ka Laisen, hynrei ki khlem ioh kumba kiwei ki ioh watla bun kiba la leit ha kajuh ka sngi bad kito kiba la dep ban ioh. Ki nongdie madan ki kren ruh da ka jingbitar bun bunsien, ba kumno ki bar jylla ki ioh katba ki trai jylla ki shah kyntaid.
Shuh shuh ki la iathuh ba bunsien haba ki leit ban mih sha ophis SMB ban bud-dien ia ka COV, ki nongtrei ha katei ka ophis ki la shu phah ap ia ki bad kular ban pyllait kyrteng noh ha ka 5 tarik Nailar, phewse haduh mynta ka sngi ka 11 tarik Nailar, ka jingkular ka long tang ha suiñ, ong ki nongdie madan.
Na ka liang jong kitei ki nongiakhih, ki la byrngem ba kin ym sangeh ia ka jingshah thngan tad haduh ba ka SMB kan ai Laisen bad ailad ba kin shong dukan hapoh MUDA kumba long lang kiwei.
