Ki Nongshong shnong jong ka Raij Ialong ha shwa ka bet ka thung ia u Symbai u Ranai ha Kper ha prah bad ha ki Hali ki Pynthor ki don ka jinglehniam kum ka knia Ryngkaw, ka Sakyryiat , ka Shadsukra bad ka Shadthoh. Ia ka knia Ryngkaw bad ka Sakyryiat ki la pyndep hynnin ka sngi (25/04/2022) ia ka Shadsukra ki la pynlong hynne ka sngi bad ia ka knia Shadthoh pat kin pynlong ha ka 28 tarik mynta u bnai kaba long lai sngi laimiet hadien ka knia Ryngkaw.
Ia ka Shadsukra ka Raij Ialong ka la pynlong hynne ka sngi ha kaba u ma Sniawbhalang Dhar MLA bad uba long ruh u Myntri sorkar ba dei peit ia ka tnat Urban Affair u long u Kongsan bad u ma Shitlang Pale MLA u Symbud kongsan. Ha kane ka sngi da ki hajar ngut ki paidbah na ki shnong kiba marjan nalor ki nongshong shnong jong ka Raij Ialong ki la iawan sakhi ia kane Shadsukra kaba shisien shisnem jong ka Raij Ialong.
U ma Sniawbhalang Dhar haba kren ha kane ka sngi, u pynpaw ka jingkmen ka bakhraw haba u la lah ban ia donlang ha kane ka Shadsukra jong ka Raij kaba long ka sngi lehkmen leh sngewbha, ka sngi ban pyni ia ka riam ka beit, ka jingdon ka jingem bad ka jingainguh ia U Blei Nongbuh Nongthaw da ka mynsiem tipbriew tipblei bad ia ki laiphew Ryngkaw kiba long ki Nongda Nongker ia ki Nongshong shnong jong ka Raij ka Muluk ia ka rep ia ka riang ia ka thung ia ka tep bad ia ka kamai ka kajih ka kha-ï ka pateng bad ka jingnangkiew ki khun samla shynrang bad kynthei ha ka pule ka puthi.
Shuh shuh u ma Sniawbhalang Dhar haba kren ha kane ka sngi u pynpaw ka jingkmen kaba khraw ba kane ka Shadsukra katba nangiaid ka por ka la nangphuh nangphieng ym tang ha ka riam ka beit hynrei ha ka jingtipbriew tipblei. Nangta u ong ba ha ki por kiba mynshwa ha kum kane ka sngi lehkmen lah ban iohi kiba buaid ruh kito kiba iashoh iadat hapdeng ki Nongpeitkai ruh kito, kiba kren da ki ktien kiba khlem akor ruh kito, hynrei mynta kine kiei kiei baroh kim don shuh hapdeng ki paidbah nongwan peitkai bad baroh naduh ki Rangbah, ki Longkimie, ki Samla bad ki Khynnah shynrang bad kynthei ki wan sha ka Shadsukra da ka mynsiem tipbriew tipblei. U ma Sniawbhalang Dhar u pynkut ia ka jingkren jong u da kaba kyntu jur ia baroh ban nangpynbha bad pynjanai shuh shuh ia ka mynsiem tipbriew tipblei ha ki sngi bad ha ki por ki ban dangwan.
Kham ha shwa la ioh ruh ia ka jingkren bad ka sneng ka kraw, ka kyntu ka kynrong kiba sngewtynnat na u Symbud kongsan ma Shitlang Pale MLA, na u Dolloi ka Elaka, Dolloi Puramon Kynjin, na u ma Singh Mulieh Ex. MLA. Ia ka jingkren pdiang burom ia ki nongiashim bynta bad ki nongwanpeitkai ia kane ka Shadsukra da u ma Pyrkhat Shylla uba long u President ka Sein Raij Ialong. Ia ka jingkren ai khublei sngewnguh da u ma Juhi Pale, Secretary Sein Raij Ialong bad ia ka jingialang lehkmen Shadsukra la pyniaid da u ma Stanly Roy Mulieh.
