Mynta ka sngi ha ka por kumba 2:30 ei ei noh phai sngi ka wei ka maruti van kaba kit ia ki marbam kum ki biskit, ki chips bad kiwei na ka bynta ban leit buh sha ki dukan bapher bapher hapoh ka sor Jowai kaba don ia u number ML 05 7271, ka la kem ding kynsan kynsan katba ka dan iaid ha surok ha Khimmusiang Jowai.
Mar sien kem ding kane ka kali u nongniah bad u nongbud ki la ryngkoh wut wut napoh kali ban lait na ka jingmynsaw. Ha kane ka jingjia katto katne ki mar kiba don hapoh kali kila julor. Ia ka daw jong ka jingkem ding ym pat lah ban tip thikna, hynrei la suba ba ka lah ban dei na ka jingthud ka enjin jong ka kali.
