Ka jingshah lymbub thuk thuk (kali ar shaka) jong ki nongleit nongwan bad ki nongshong die ha ki bynta jong ka Ïawthymme kaba don ha Ladthalaboh, Jowai kala iai jia la jan manla ka por bad kane kala pynshong syier bad pynrit mynsiem ia ki paidbah ha kitei ki bynta.
Mynta ka sngi kala don ka jingshah lymbub kawei ka kynthei kaba la mynsaw ha ki bynta jong ka kjat. Ha kawei pat ka jingjia dang ha kane hi ka taiew ba ladep ha ka sngi Saitjaiñ kawei ka longkmie kala mynsaw jur na ka jingshah lymbub bad la hap ban pynkit noh ia ka sha ka jaka ai jingsumar, ong uwei u rangbah ma W. Ryngkhlem uba dei ruh u President jong ki nongdie doh ba shong die hajan katei ka jaka.
Ula ïathuh ha u nongthoh khubor lyngba ka phone ba kane ka dei tang na ka daw ka jingñiah khlem akor ki nongñiah thuk thuk, kiba la ñiah stet nalor ba katei jaka ka long kaba bun briew bad ki kali kiba ïaid ba ïeng.
Shuh shuh ula pynsngew kum ki paidbah ki buh ka jingkyntu ïa ki bor ba dei peit ba kin shim khia ïa kane bad ban teh lakam ïa ki nongñiah thuk thuk kiba ñiah klumar bad la dei ruh ban buh da ki jingmana ha kitei ki bynta khnang ba lait na ka jingmynsaw bad ka jingshah lymbub ki paidbah.
Ula ong ruh lada ym don sa ki pulit ba pynïaid kali ha katei ka jaka kala nang kham jur shuh shuh ka jingshah lymbuh bad ka jingtakhuh kali kaba la pynshong syier mynsiem ïa kiba bun ba lang.