Ka Dorbar Shnong Pammanik West Jaiñtia Hills District, lyngba ka kyrwoh ba la phah da u General Secretary ka Dorbar Shnong Pammanik u bah Shibor Langstang, kala pynpaw ka jingpyrshah jur halor ka jingiaid ki trok kit dewïong lyngba u surok shnong, namar kumba long mynta une u surok shnong u la sniew bad u la jot la pra tang na ka daw ka jingiaid ki trok kit dewïong palat pud kaba la wan rah ka jingjot jong une u surok jong ka shnong Pammanik.
Kane ka jingjot une u surok kala buh ka jingeh kaba khraw ia ki paidbah nongshong shnong bad ki nongleit nongwan lyngba une u surok, khamtam ha ka kit ka bah bad ha ka pang ka shitom. Kumta na ka liang ka Dorbar Shnong ka la shim ia ka rai ban khang shisyndon ia kane ka jingiaid jong ki trok, lada lap ia kino kino ki kali kit dewïong ba dang iaid lyngba une u surok shnong yn shim ia ka rai da kaba tyngeh bad ban aiti ia ki sha ki bor jong jong ka aiñ.
Na ka liang ka Dorbar Shnong ka la kyrpad ruh ia ki trai bad ki nongniah kali kit dewïong ba kin sngewbha ban burom bad ban iatreilang bad ka Dorbar Shnong khnang ban lait na kino kino ki jingjia kiba sngewsih.