U Bah Pyniaid Sing Syiem, CEM jong ka KHADC ha ka ka 13 tarik u la pyntip sha ki lad pathai khubor ha ka jingialang ba kyrkieh ka Executive Committee jong ka Council, da ka ba pynpaw ba ka KHADC nangne shakhmat ka la khang pyrshah ia kino kino ki kynhun kiba pyrshang ban ialap ban khang bam doh masi ha ka ri Khasi.
Namar katkum ka jingtip la iathuh ba ka la don kawei ka seng ba la tip kum ka Gau Dhwaj sthapana bharat Yatra kaba thmu ban wan ialap khang bam doh masi ha ka 2 tarik October 2024.
U la ong ba na ka liang ka District Council kan sa phah da ka jingthoh sha ka Sorkar bad ki bor pyniaid District bapher bapher ha ka jylla ba kim dei ban ailad ia kum kine ki jingthmu.
U pynpaw ruh ba ka jingbam doh masi jong ki khasi ka dei ka jingbam tynrai kaba la don naduh mynshwa. Lada kine ki kynhun ki wan ban khang bad mushlia ia ka rukom bam kan ktah ia ka jinglong tynrai jong u Khasi la ha bam ka dih ka kup ka sem ne ha ka khyndew ka shyiap.