Ka Khubor kaba la iohlum na ki katto katne ki riew ieid party ka United Democratic Party (UDP) hapoh ka 2 Jowai Legislative Assembly la ong ba naduh ka elekshon MLA kaba dang shudep hapoh ka jingialam jong u ma Moonlight Pariat kum u President jong ka Party, ki riewieid party (UDP) kim ju ioh wat shisien ruh ia ka jingialang jong ka party bad ha kane ka elekshon MP kaba dang shu dep ruh ki riewieid party kim ju ioh ia ka jingialang jong ka Party ka ban ong la kin kyrshan ia u briew (Candidate jong ka Party) bad namar ba kam don da ka jingialang jong ka Party bun ki dkhot jong ka Party ki kyrshan kat sha uba ki mon bad kane ka pyntlot ia ki riew ieid party jong ka UDP.
Ban pynim biang ia ka mynsiem ieid party jong ki riew ieid party UDP, hynne ka sngi 28 tarik September 2024, hapoh ka jingialam jong u ma Marki Mulieh, ki riew ieid party UDP na baroh ki nongkitkam jong ka party na ki shnong bapher bapher jong ka 2 Jowai Assembly constituency ki la ia kynduhlang ha Ophis treikam jong ka Party ha Ladthadlaboh Jowai ban pynkhie im biang ia ka mynsiem ieid party jong ki nongkyrshan ka party UDP.
Ban pynkhie im biang ia ka Party UDP, la jied ia ka Adhoc Committee ha kaba u ma Marki Mulieh u long u Chairman jong ka Committee bad sa hynniew ngut ki dkhot kiba kynthup ia u ma John Sutnga, ma Michael Kyndait, ma Coming Partuh, ma B. Muruh, ma Mon Phawa, ma Biwest Suchiang bad u ma Dari Pde.