-Ïa ka them Metor ym lah pynkhih, wan pynkhih ïa ngi!!!-
Ka Shillong Municipal Board (SMB) ha ryngkat ka jingiatreilang ki Pulit ka Jylla, hynne ka sngi ka 30 tarik Jylliew 2025 ki la sdang ban beh da ka bor ia baroh kiba die madan ha 9-Lad kynthup ia ki Khasi bad ki bar Jylla.
Katei ka jingleh jong ki bor pulit ka dei hadien ba ka Sorkar ka la dep ban ai lypa ia ka jingpyntip ba kin pynkynriah noh ia baroh ki nongdie madan na katei ka jaka sha ka jaka ieng kali (Parking lot) jong ka MUDA kaba don ha 9-Lad (Police Bazar).
Ha ka jingsdang jong ka SMB ban kylli na ki nongdie madan la ki la don ne em ia ki laisen (Licence) lane ka syrnod ba la ithuh da ka Sorkar bad ka SMB, bun na ki nongdie madan Khasi ki la pyneh bad pyni bor ha kaba shipor la don ka jingiakhyñiat hapdeng ki pulit bad ki nongdie madan. Namar ka jingkyntaid jong katto katne ki nongdie madan, ki pulit kim banse ban beh ia ki da ka bor bad la don katto katne kiba la leh kumba bthah ia ki da ki bor pulit, don pat katto katne kiba pyneh bad sei ruh da ki tiar pynmynsaw.
Ha kane ka jingiakhih, la iohi ba ki bar Jylla ki la pyndem katba kiba bun na ki Khasi ki la ainia bad buh jingkylli kylla ia ki bor pulit bad SMB da kaba ong ba kumno para Khasi kiba bylla ha la ka Jylla ki beh balei kim beh shwa ka ki briew kiba shong ha Them Metor. Shuh shuh ki la ong “ngi dei ki Khasi ngim donkam laisen hato ki ‘Khar metor ki don kot”.
Ha katei ka jingiakhih ka Kong Anjela Rngad kaba dei kawei na ki nongtrei mon sngewbha, ka la wan ban ai jingkyrshan ia ki nongdie madan naduh mynstep da kaba pynrem ruh ia ka Sorkar kaba la leh kyndit kyndit ia kane ka kam kumba wan u nongtuh. ” Kane kam dei ka rukom ban iaid ia ka aiñ. Kumno ai laisen ia ki bym dei ban ai. Kane kadei tang ka jingkwah ban pyni bor” ong ka Kong Anjela.
Ha kaba iadei bad kane ka jingleh jubor, ka Kong Anjela ka la iathuh ba ki la dep ban buh 4 tylli ki ejahar ha Sirdar Police Station pyrshah ia ka SMB.
