U Rev. Sunshine Warjri, Saiñpyniar jong ka Dorbar Kur Warjri u la khlad noh ha ka 29 tarik Nailar, 2024 ha Robert’s Hospital hapdeng ka jingshah sumar ba tang khyndiat por. La kha ia u Pastor Warjri ha ka 23 tarik Rymphang 1950 ha nongbah Shillong bad u la shakri kum u saiñpyniar jong ka Dorbar Kur Warjri naduh ba la seng ha u snam 1998 bad u la iohlad ban ia rakhe ryngkat bad la ki parakur ia ka lyngkhuh arphewsan snem ka ba la long ha u bnai Naiwieng 2023 ha Thynroit.
Kum u nongialam jong ka Dorbar Kur Warjri u Pastor Warjri u la trei shitrhem ban pynkha haduh palat laiphew tylli ki shnat Dorbar Kur Warjri bad ha ki ba bun ki kam leh-i-synei ia ki parakur parajait ki ba shem lanot ha kylleng ka Ri Khasi. U Pastor Warjri u dei ruh u dkhot rangbah jong ka Young Men Christian Association (YMCA) bad u ba kit khia byllai ki sengbhalang kynthup ruh kum u nongialam niam ha ka Balang Church of Jesus Christ Full Gospel bad ha ka Dorbar Shnong Jaiaw Laitdom.
Ha ka ba la khlad noh u Pastor Sunshine Warjri la sahnud bad tmang ka longiing longsem jong ka kmie ki khun Kong Evisnolian Sooanes, arngut ki khun kynthei, saw ngut ki khun shynrang bad byllai ki ksiew. U Pastor Warjri u dei ruh u duhalia bad kaitor batbit naduh ki por samla ba u la ju long teng u dkhot jong ka kynhun tem ‘Beat Four Beat Five’ bad u dang iai bteng ban rwai bad tem ha ki jingiaseng balang bad ha ki dorbar Kur Warjri haduh ka jingrakhe ia ka Lyngkhuh Snem Rupa ha u snem 2023 ha Thynroit.
Ka riti ban pynkhuid ia ka met jong u Pastor Warjtri kan long la Sngisaitjaiñ 31 tarik Nailar, 2024 naduh 2 baje nohphaisngi na jaka sah ha Jaiaw laitdom bad yn leit ontep sha ka Lumjingtep balang ha Lawmali.